14 марти соли 2018 дар Бонки миллии Тоҷикистон вохӯрии ҷамъбастии ҳайати коршиносон-баҳогузорони Гурӯҳи Авросиё оид ба муқовимат ба қонунигардонии даромадҳои бо роҳи ҷиноят бадастоварда ва маблағгузории терроризм (ГАО) бо ҳайати Комиссияи доимоамалкунандаи байниидоравӣ оид ба муқовимат ба қонунигардонии даромадҳои бо роҳи ҷиноят бадастоварда, маблағгузории терроризм ва маблағгузории паҳнкунии силоҳи қатли ом (МҚД/МТ/МПСҚО) таҳти роҳбарии Ёрдамчии Президенти Ҷумҳурии Тоҷикистон оид ба масъалаҳои ҳуқуқӣ      Ватанзода Маҳмадалӣ - баргузор гардид.

Дар доираи ташрифи ҳайати мазкур тибқи барнома як қатор вохӯриҳои  коршиносон-баҳогузорони ГАО бо намояндагони Тоҷикистон, аз ҷумла, бо ҳайати Комиссия, мақомоти ҳифзи ҳуқуқ, cохторҳои назоратӣ ва бахши хусусӣ гузаронида шуданд.

Дар рафти суханронӣ роҳбари Комиссия Ватанзода М.М. изҳор дошт, ки мақсад аз баргузории вохӯриҳои болозикр баҳогузории мутобиқати самаранокии кишвар ба стандартҳои байналмилалӣ дар самти МҚД/МТ/МПСҚО, инчунин, фаъолияти мақомоти салоҳиятдор дар ин самт мебошад.

Дар рафти ҷаласаи ҷамъбастӣ, аз ҷониби коршиносон-баҳогузорон шакли ниҳоии лоиҳаи ҳисобот оид ба ҳайати сайёрӣ пешниҳод гардид, ки дар оянда барои тақвият бахшидани ҳамкории муштарак миёни мақомоти салоҳиятдори Ҷумҳурии Тоҷикистон бо коршиносон-баҳогузорони ГАО ҷиҳати омода намудани ҳисоботи баҳодиҳии тарафайни Ҷумҳурии Тоҷикистон дар мувофиқа ба стандартҳои Гурӯҳи татбиқи чораҳои молиявӣ (ФАТФ) ва самаранокии низоми МҚД/МТ/МПСҚО ба кор бурда хоҳад шуд.

Хотиррасон менамоем, ки дар Ҳайати Комиссияи доимоамалкунандаи байниидоравӣ оид ба МҚД/МТ/МПСҚО  Ёрдамчии Президенти Ҷумҳурии Тоҷикистон оид ба масъалаҳои ҳуқуқӣ (роҳбари Комиссия); Муовини Раиси Бонки миллии Тоҷикистон (муовини роҳбари Комиссия); Муовини раиси Суди Олии Ҷумҳурии Тоҷикистон; Муовини Прокурори генералии Ҷумҳурии Тоҷикистон; Муовини директори Агентии назорати давлатии молиявӣ ва мубориза бо коррупсияи Ҷумҳурии Тоҷикистон;  Муовини директори Агентии назорати маводи нашъаовари назди Президенти Ҷумҳурии Тоҷикистон; Муовини директори Агентии омори назди Президенти Ҷумҳурии Тоҷикистон; Муовини Вазири адлияи Ҷумҳурии Тоҷикистон; Муовини Вазири молияи Ҷумҳурии Тоҷикистон; Муовини Вазири рушди иқтисод ва савдои Ҷумҳурии Тоҷикистон; Муовини Вазири корҳои дохилии Ҷумҳурии Тоҷикистон; Муовини Раиси Кумитаи давлатии амнияти миллии Ҷумҳурии Тоҷикистон; Муовини раиси Кумитаи давлатии сармоягузорӣ ва идораи амволи давлатии Ҷумҳурии Тоҷикистон; Муовини Раиси Кумитаи андози назди Ҳукумати Ҷумҳурии Тоҷикистон; Муовини сардори Хадамоти гумруки назди Ҳукумати Ҷумҳурии Тоҷикистон; Муовини сардори Хадамоти муҳоҷират; Муовини сардори Хадамоти алоқаи назди Ҳукумати Ҷумҳурии Тоҷикистон; Директори Департаменти мониторинги молиявии назди Бонки миллии Тоҷикистон (котиби Комиссия) ва Раиси Ассотсиатсияи бонкҳои Ҷумҳурии Тоҷикистон бо даъвати Муовини Вазири корҳои хориҷии Ҷумҳурии Тоҷикистон ва Муовини директори Агентии амнияти ядроӣ ва радиатсионии Академияи илмҳои Ҷумҳурии Тоҷикистон шомил мебошанд.

Департаменти мониторинги молиявӣ