Аз 30 ноябр то 9 декабри соли ҷорӣ ҳайати Бонки рушди Осиё дар доираи лоиҳаи ёрии техникӣ ба Ҷумҳурии Тоҷикистон ҷиҳати такмили низоми муқовимат ба қонунигардонии (расмикунонии) даромадҳои бо роҳи ҷиноят бадастоварда ва маблағгузории терроризм (МҚД/МТ) дар Душанбе қарор дорад.

Дар доираи бахши ёрии техникии номбурдаи Баҳодиҳии хавфи миллӣ 3 декабри соли равон дар Бонки миллии Тоҷикистон семинари Гуруҳи корӣ оид ба гузаронидани Баҳодиҳии хавфи миллии назди Комиссияи байниидоравӣ оид ба муқовимат ба қонунигардонии даромадҳои бо роҳи ҷиноят бадастоварда ва маблағгузории терроризм баргузор гардид.

Ҷаласаро бо сухани ифтитоҳӣ муовини якуми Раиси Бонки миллии Тоҷикистон Нуралиев Ҷ.К., оғоз намуда, иброз дошт, ки аз ҷониби Ҷумҳурии Тоҷикистон дар ин самти як қатор корҳои назаррас, аз ҷумла ба роҳ мондани низоми самараноки амалкунанда ва қабули санадҳои меъёрии ҳуқуқие, ки фаъолияти низомро ба роҳ мемонанд, таҳия ва қабул гардиданд.

Ҷамолиддин Нуралиев дар идомаи суханронии хеш инчунин қайд намуданд, ки барпо кардани низоми устувори МҚД/МТ пеш аз ҳама барои бартараф намудани хавфҳои амнияти миллӣ, баланд ва ҷолиб намудани фазои сармоягузории молиявӣ ва ғайра мусоидат хоҳад кард.

Дар ҷараёни семинар таъкид карда шуд, ки роҳҳои ошкор кардан, баҳодиҳии дуруст ва фаҳмиши хавфҳои қонунигардонии даромадҳои бо роҳи ҷиноят бадастоварда ва маблағгузории терроризм, ҷузъи муҳими инкишофи низоми МҚД/МТ дар Ҷумҳурии Тоҷикистон ба шумор мераванд.

Қобили қайд аст, ки гузаронидани Баҳодиҳии хавфи миллӣ яке аз талаботҳои асосии тавсияҳои нави Гурӯҳи татбиқи чораҳои молиявӣ (ФАТФ) ба ҳисоб меравад.

Тибқи нақша семинар бо иштироки намояндагони мақомоти давлатӣ ва бахши хусусӣ тайи ду рӯз давом ёфта, иштирокдорони он масъалаҳои муҳими бахши инкишофи низоми МҚД/МТ-ро баррасӣ менамоянд.

Хадамоти матбуоти   
БМТ