Семинар бо иштироки мутахассиси ХБА

19 сентябри соли равон дар Бонки миллии Тоҷикистон бо иштироки кормандони Департаменту идораҳои бонк семинар дар мавзуи “Идораи самараноки захираҳои байналмилалӣ” баргузор гардид. Дар назди ҳозирин мутахассиси бахши молиявии Хазинаи байналмилалии асъор ҷаноби Винсент Флуриет бо маърӯзаҳои муфид ва ҷолиб баромад намуд.

Номбурда дар ҷараёни семинар оид ба самаранок идора намудани захираҳо маслиҳатҳои муфид дода, ба саволҳои ҳозирин ҷавобҳои муфассал ва мушаххас дод.

Тибқи барномаи тасдиқшуда семинар аз ду қисм - “Идоракунии захираҳо бо назардошти хавфҳо” ва “Тақсимбандии стратегии захираҳо”иборат буд.

Тавре ҷаноби Винсент Флуриет дар қисмати аввали семинар қайд намуд, мувофиқи тавсияҳои ХБА оид ба захираҳои байналмилалии БМТ, аз рӯи якчанд ченакҳо, аз ҷумла қарзҳои кутоҳмуддати давлатӣ ва ҳаҷми пули миллӣ кофӣ ва мусбат арзёбӣ шудаанд. Дар баробари ин, иброз дошт, ки дар ташкили захираҳо мақсадҳои зерин, аз қабили таъминнокии пардохтпазирӣ, идоракунии сатҳи қурби асъор бо мақсади коҳиш додани лаппишҳои он ва нигоҳ доштани муътадилии қурби пули миллӣ дар мадди аввал меистанд.

Дар қисми дуюми семинар иштирокдорони он оид ба ҷой доштани хавфҳои асъорӣ, бозорӣ, қарзӣ, пардохтпазирӣ, амалиётӣ ва ҳуқуқӣ дар идоракунии захираҳо муҳокимаронӣ намуда, паҳлуҳои гуногуни хавфҳоро баррасӣ карданд.

Қобили қайд аст, ки ҷамъомади мазкур барои ташкили ҳамкориҳои зичу судманд бо ташкилотҳои бонуфузи молиявӣ мусоидат менамояд.

Ва ниҳоят, дар поёни семинар аҳли нишаст дар самти рушди дарозмуддат ва самаранокии идоракунии захираҳои байналмилалӣ якчанд пешниҳодҳоро қабул карданд.

Хадамоти матбуоти   
БМТ