Қонуни ҶТ “Дар бораи хизматрасониҳои пардохтӣ ва низоми пардохтӣ” қабул гардид

Бонки миллии Тоҷикистон ҷиҳати татбиқи Стратегияи рушди низоми пардохтии Ҷумҳурии Тоҷикистон барои солҳои 2015-2025 бо мақсади фароҳам овардани шароити мусоид барои рушди низомҳои пардохтӣ, ба танзим даровардани хизматрасониҳои пардохтӣ, мутобиқ намудани заминаи меъёрии ҳуқуқӣ ба таҷрибаи муосири байналмилалӣ, ҳимояи манфиатҳои истеъмолкунандагони хизматрасониҳои пардохтӣ лоиҳаи Қонуни Ҷумҳурии Тоҷикистон ”Дар бораи хизматрасониҳои пардохтӣ ва низоми пардохтӣ”-ро таҳия намуд. Қонуни мазкур санаи 24 феврали соли 2017 аз ҷониби Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба имзо расонида шуд.

Қонуни Ҷумҳурии Тоҷикистон “Дар бораи хизматрасониҳои пардохтӣ ва низоми пардохтӣ” фаъолияти таҳвилгарони хизматрасониҳои пардохтӣ, аз ҷумла интиқолдиҳандагони маблағҳои электронӣ, агентҳо ва субагентҳои бонкии пардохтӣ, операторони низомҳои пардохтӣ, танзимгарони хизматрасониҳои инфрасохтори пардохтиро ба танзим дароварда, талаботро барои ташкил ва фаъолияти низомҳои пардохт ва тартиби назоратро аз рӯи фаъолияти онҳо муқаррар менамояд.

Инчунин, бо мақсади пурзӯр намудани назорати ҷамъоварии пардохтҳо ва таъмини шаффофият дар фаъолияти ҷамъоварии пардохтҳо дар қонуни мазкур талаботҳо барои фаъолияти агентҳои/субагентҳои бонкии пардохтӣ ва истифодаи терминалҳои худкори худхизматрасон муқаррар гардидаанд.

Мутобиқи талаботи қонуни қабулшуда ширкатҳои бо ҷамъоварии пардохтҳо машғулбуда бояд иҷозатномаи фаъолияти оператори низоми пардохтиро гиранд ё ҳамчун агентҳои бонкии пардохтии ташкилотҳои қарзӣ амал намуда, ҷамъоварии пардохтҳоро анҷом диҳанд.

Қобили қайд аст, ки айни замон аз ҷониби чор ташкилоти қарзӣ 1306 адад терминалҳои худкори худхизматрасон барои ҷамъоварии пардохтҳо фаъолият намуда истодаанд (ҶСК “Бонки Эсхата”- 483 адад, ҶСП “Аввалин бонки молиявии хурд”- 18 адад, ҶСП БС “Конт”-2 адад ва ҶДММ ТАҚХ “Авфар”-803 адад) ва ин ташкилотҳои қарзӣ ба муштариёни худ хизматрасониҳои пардохтиро пешниҳод намуда истодаанд.

Шуъбаи матбуоти  
БМТ