Бойгонии ахбор
Мулоқоти Ҷамолиддин Нуралиев бо Питер Фернандес Карди
8 августи соли 2017 Муовини якуми Раиси Бонки миллии Тоҷикистон Ҷамолиддин Нуралиев бо Директори намояндагии Вазорати рушди байналмилалии Британияи Кабир (DFID) дар Осиёи Марказӣ ҷаноби Питер Фернандес Карди мулоқоти корӣ анҷом дод.
Мулоқоти мазкур дар доираи барномаи вохӯриҳои Директори намояндагии Вазорати рушди байналмилалии Британияи Кабир дар Осиёи Марказӣ бо роҳбарони як қатор вазорату идораҳои давлатӣ анҷом ёфта, зимни вохӯрӣ масъалаҳои вобаста ба татбиқи барномаҳое, ки аз ҷониби Ҳукумати Британияи Кабир тавассути институтҳои молиявии байналмилалӣ дастгирӣ мешаванд, муҳокима гардиданд.
Муовини якуми Раиси Бонки миллии Тоҷикистон Ҷамолиддин Нуралиев нахуст Директори намояндагии Вазорати рушди байналмилалии Британияи Кабир дар Осиёи Марказӣ ҷаноби Питер Фернандес Кардиро бо вазъи ҷории нишондиҳандаҳои макроиқтисодӣ ва молиявии ҷумҳурӣ, бахусус фаъолияти низоми бонкӣ шинос намуда, дар мавриди кӯмакҳои пешниҳоднамудаи DFID дар самти ислоҳоти бахши молиявӣ ибрози назар намуд.
Ҷамолиддин Нуралиев намояндаи Вазорати рушди байналмилалии Британияи Кабирро ба идомаи ҳамкории самараноки мутақобила даъват намуда, қайд кард, ки низоми бонкии Ҷумҳурии Тоҷикистон ба дастгирӣ ва пешниҳоди кӯмакҳои техникии навбатӣ тавассути татбиқи таҷрибаи пешрафта дар самтҳои мухталиф, аз ҷумла, сиёсати монетарӣ, назорати бонкӣ, суботи молиявӣ ва бахши суғурта ниёз дорад.
Дар навбати худ, Директори DFID Питер Фернандес Карди изҳор дошт, ки Намояндагии Вазорати рушди байналмилалии Британияи Кабир дар Осиёи Марказӣ дар пешбурди низоми бонкӣ ҳамкориҳои судмандро идома дода, омода аст пешниҳодҳои минбаъдаи мушаххасро дар ин самт мавриди омӯзиш қарор диҳад.
Инчунин, дар ҷараёни мулоқот, Муовини якуми Раиси Бонки миллии Тоҷикистон Ҷамолиддин Нуралиев аз Директори DFID Питер Фернандес Карди даъват намуд, ки барои ҳавасмандгардонии бонкҳои Британияи Кабир дар Ҷумҳурии Тоҷикистон мусоидат намояд.
Дар хотимаи мулоқот бо қаноатмандӣ зикр гардид, ки барои ба роҳ мондани ҳамкорӣ тамоми имкониятҳо мавҷуд буда, тарафҳо аз он самаранок истифода хоҳанд бурд.
Шуъбаи матбуоти БМТ