Бойгонии ахбор
Ифтитоҳи майдончаи варзишӣ
Дар асоси дастуру супоришҳои Асосгузори сулҳу Ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар самти сиёсати созандагию бунёдкорона ва иқдоми пешгирифтаи Раиси шаҳри Душанбе Рустами Эмомалӣ, имрӯзҳо дар ҳама гӯшаву канори шаҳри Душанбе ҷараёни корҳои навсозӣ ва ободгардонии боғҳои фарҳангиву фароғатӣ ва майдончаҳои варзишию истироҳатӣ вусъат меёбанд.
Аз ҷумла, 11 августи соли равон бо ибтикори Бонки миллии Тоҷикистон дар кӯчаи Ҳофизи Шерозии ноҳияи Исмоили Сомонии шаҳри Душанбе як майдончаи варзишию истироҳатӣ барои наврасон ба истифода дода шуд. Лоиҳаи майдончаи мазкур аз ҷониби ширкати ПИТЛ “Душанбешаҳрсоз” тарҳрезӣ гардида, корҳои сохтмонӣ аз тарафи Ҷамъияти дорои масъулияташ маҳдуди “Сохтмони шаҳр” дар муддати се моҳ ба маблағи 520 000 сомонӣ ба анҷом расонида шуд.
Муовини раиси Бонки миллии Тоҷикистон Сироҷиддин Икромӣ зимни суханронӣ ҷавонону наврасонро бо фарорасии ҷашни 26-умин солгарди Истиқлолияти давлатии Ҷумҳурии Тоҷикистон муборакбодӣ намуда, нақши ҷавонони кишварро ҳамчун сарчашмаи ташаббусҳои бузург, манбаи ғояҳои нав ва эҷодкори тақдири имрӯзу ояндаи Тоҷикистон муҳим арзёбӣ намуд.
Раиси ноҳияи Исмоили Сомонии пойтахт Самӣ Шариф Ҳамид изҳор дошт, ки ифтитоҳи иншооти мазкур идомаи дастгирии сиёсати бунёдкоронаи ҳукумати ҷумҳурӣ буда, иқдомоти мазкур дар Соли Ҷавонон боз идома хоҳанд ёфт.
Қобили қайд аст, ки масоҳати умумии майдончаи варзишию истироҳатӣ 1086 метри мураббаъро ташкил дода, дар ҳудуди он як майдончаи варзишии универсалӣ барои бозиҳои футбол, волейбол ва баскетбол, маҷмаа барои бозии кӯдакон (чархофалаку алвонҷак), як ҳавзчаи шиноварӣ ва майдонча барои машғулиятҳои варзиши бадан сохта ба истифода дода шудааст.
Шуъбаи матбуоти БМТ