Дави миллӣ баҳри рушди ҷомеаи солим

20 майи соли 2018 дар Ҷумҳурии Тоҷикистон Рӯзи дави миллӣ ва Марафони велосипедронӣ бахшида ба таҷлили “Рӯзи ҷавонони Тоҷикистон” доир гардид.

Дар тантанаи ифтитоҳи Дави миллӣ Ёрдамчии Президенти Ҷумҳурии Тоҷикистон оид ба масъалаҳои рушди иҷтимоӣ ва робита бо ҷомеа Абдуҷаббор Раҳмонзода, Роҳбари дастгоҳи шаҳри Душанбе Саидзода Тоҷиддин оид ба оммавияти варзиш ва дастгириҳои бевоситаи Асосгузори сулҳу ваҳдати миллӣ-Пешвои миллат муҳтарам Эмомалӣ Раҳмон дар ин самт суханронӣ намуда, барои иштирокчиён барору комёбиҳо орзу намуданд.

Баъдан, аз кормандони Дастгоҳи иҷроияи Президенти Ҷумҳурии Тоҷикистон, то кормандони вазорату идораҳо дар баробари варзишгарон дар Дави миллӣ фаъолона иштирок намуданд. Аз ҷумла, кормандони Бонки миллии Тоҷикистон дар ҳайати беш аз 100 нафар таҳти роҳбарии Муовини Раиси Бонки миллии Тоҷикистон Ҳамидулло Машрабзода дар Дави миллӣ ширкати фаъол дошта, сазовори Дипломи Кумитаи кор бо ҷавонон ва варзиши назди Ҳукумати Ҷумҳурии Тоҷикистон гаштанд.

Тибқи маълумоти Кумитаи кор бо ҷавонон ва варзиши назди Ҳукумати Ҷумҳурии Тоҷикистон, дар чорабинии имсолаи Дави миллӣ 436 624 нафар сокинони ҷумҳурӣ иштирок намуданд, ки аз ин теъдод 124 651 нафарро бонувон ташкил медиҳанд. Аз шаҳри Душанбе бошад, имсол беш аз 45 ҳазор нафар дар чорабинии муҳимми варзишӣ ширкат варзиданд.

Иштирокчиёни сабқати миллӣ аз даромадгоҳи маҳаллаи Чорбоғ тавассути хиёбони Ҳофизи Шерозӣ то Наврӯзгоҳ дар масофаи зиёда аз 10 км давиданд.

Иштирокдорони Дави миллӣ бо ҷонибдорӣ аз сиёсати хирадмандонаи Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, ки баҳри рушди ҷомеаи солиму адолатпарвар, тарбияи тафаккури созандаю бунёдкорона ва бедорию афзоиши ифтихори миллӣ ва худогоҳию худшиносӣ равона гардидааст, бо иштироки фаъол дар чунин чорабиниҳои муҳим баҳри ноил гардидан ба нақшаҳои Ҳукумати Ҷумҳурии Тоҷикистон дар самти рушд талош хоҳанд варзид.

Бояд қайд кард, ки чорабинии мазкур бо мақсади оммавӣ гардонидани варзиш, ташкили мусобиқаҳои гуногуни варзишию бардамӣ, ҳавасмандии ҷавонони ҷасуру чолок, варзишгарони соҳибифтихори Ватан, таҳким бахшидани тарзи ҳаёти солим, тарбияи мутахассисони варзидаи соҳа, рушду инкишофи соҳаи варзиш ҳамасола доир мегардад. Бори аввал, 17 майи соли 2005 Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба чорабинии муҳимми Дави миллӣ ибтидо гузошт. Бо Фармони Асосгузори сулҳу ваҳдати миллӣ-Пешвои миллат, Президенти ҶТ, муҳтарам Эмомалӣ Раҳмон аз 28 марти соли 2007, таҳти №225 ҳар сол якшанбеи сеюми моҳи май дар саросари кишвар Рӯзи дави миллӣ доир карда мешавад.

Шуъбаи матбуоти БМТ