Татбиқи дастуру супоришҳои Президенти Ҷумҳурии Тоҷикистон муҳтарам Эмомалӣ Раҳмон дар амал

Дар доираи иҷрои дастуру супориш ва тавсияҳои Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, ки санаи 10 майи соли 2019 дар мулоқот бо кормандони мақомоти молия, андоз, гумрук, сармоягузорӣ ва бонкҳо ба низоми бонкии кишвар додашуда, 20 июли соли равон дар шаҳраки Ғарм бо иштироки Раиси Бонки миллии Тоҷикистон Ҷамшед Нурмаҳмадзода, Раиси Раёсати БДА ҶТ “Амонатбонк” Сироҷиддин Икромӣ ва роҳбарону кормандони масъули филиалҳо, марказҳои хизматрасонии филиалҳои ташкилотҳои қарзии молиявӣ ва ташкилотҳои маблағгузории хурди дар минтақаи Рашт фаъолияткунанда ҷаласаи васеъ баргузор гардид.

Ҷаласаро Раиси Бонки миллии Тоҷикистон Ҷамшед Нурмаҳмадзода ҳусни оғоз бахшида, диққати иштирокдоронро ба дастуру супоришҳои Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, ки ҳангоми мулоқот бо кормандони соҳаи молия, андоз, гумрук, сармоягузорӣ ва бонкҳо санаи 10 майи соли 2019 ва зимни сафари корӣ ба навоҳии минтақаи Рашт рӯзҳои 24-26 июни соли равон дода шуданд, ҷалб намуда, иброз дошт, ки мо бояд эродҳои гирифтаи Президенти Ҷумҳурии Тоҷикистон муҳтарам Эмомалӣ Раҳмонро нисбат ба низоми бонкӣ сари вақт бартараф намуда, таҳти иҷрои қатъӣ қарор диҳем.

Ҷ.Нурмаҳмадзода дар идомаи чорабинӣ ба роҳбарони филиалу марказҳои хизматрасонии бонкии мустақили ташкилотҳои қарзии молиявӣ, ташкилотҳои маблағгузории хурд ва фондҳои қарздиҳии дар минтақа фаъолияткунанда тавсия дод, ки дар самти паст кардани фоизи қарзҳо, равона кардани воситаҳои қарзӣ ба соҳаҳои истеҳсолӣ, соҳибкорӣ, рушди деҳот, тақвияти ҳунарҳои мардумӣ, дастгирии соҳаи кишоварзӣ, рушди сайёҳӣ ва ғайра чораҳои дахлдор андешанд.

“Новобаста аз мусбат арзёбӣ гардидани нишондиҳандаҳои омории бонкӣ дар ҷамъбасти нимсолаи авввали соли 2019 дар минтақа, ҳоло ҳам камбудиву норасоиҳо ба назар мерасанд. Бинобар ин, бо истифода аз шароити мусоид ва малакаю истеъдоди баланди касбӣ моро зарур аст, ки ба муваффақиятҳои бештар ноил гардем”- таъкид намуд Ҷ.Нурмаҳмадзода.

Раиси Раёсати БДА ҶТ “Амонатбонк” Сироҷиддин Икромӣ дар навбати худ иброз дошт, ки баланд бардоштани сатҳу сифати хизматрасониҳои бонкию молиявӣ ба кормандони низоми бонкӣ алоқамандии зич дорад. Аз ин рӯ, барои баланд бардоштани сатҳу сифати хизматрасониҳои бонкӣ ба мардум, бахусус соҳаҳои буҷавӣ бояд чораҳои амалӣ андешида шавад.

Дар идомаи ҷаласа мудири Шуъбаи минтақавии Бонки миллии Тоҷикистон дар шаҳраки Ғарм Мустафо Ниёзов тавассути рӯнамоӣ ҷамъбасти натиҷаҳои фаъолияти низоми бонкии минтақаи Раштро дар нимсолаи якуми соли 2019 ба таври васеъ шарҳ дода, барои беҳтар намудани сатҳу сифати хизматрасониҳои бонкию молиявӣ як қатор пешниҳоду тавсияҳоро мавриди муҳокимаи роҳбарияти Бонки миллии Тоҷикистон ва БДА ҶТ “Амонатбонк” қарор дод.

Ҷаласаро Раиси Бонки миллии Тоҷикистон Ҷ.Нурмаҳмадзода ҷамъбаст карда, ба роҳбарону кормандони низоми бонкии минтақа барои меҳнати содиқонаашон нисбати халқу диёр бурдбориҳо таманно намуд.

Шуъбаи матбуоти БМТ