Мулоқоти Муовини Раиси Бонки миллии Тоҷикистон бо намояндагони Бонки Ҷаҳонӣ

13 декабри соли 2019 Муовини Раиси Бонки миллии Тоҷикистон Ҳамидулло Машрабзода дар доираи татбиқи лоиҳаи “Баланд бардоштани рақобатнокии бахши хусусӣ” бо намояндагони Бонки Ҷаҳонӣ, таҳти роҳбарии Намояндаи доимии Бонки Ҷаҳонӣ дар Ҷумҳурии Тоҷикистон ҷаноби Ян-Петер Олтерс мулоқот доир намуд.

Дар оғози мулоқот Ҳамидулло Машрабзода аз ҳамкории судманди Бонки миллии Тоҷикистон ва Бонки Ҷаҳонӣ изҳори қаноатмандӣ карда, иброз дошт, ки вохӯрии мазкур ҷамбастӣ буда, барои ба анҷом расонидани лоиҳа мутахассисони Бонки миллии Тоҷикистон тӯли 2 соли охир дар асоси технологияҳои муосир як қатор низомҳоро, ки барои рушд ва фаъолияти самараноки бахши бонкдорӣ равона шудааст бо муваффақият татбиқ намуданд, ки Низоми автоматишудаи байнибонкии интиқоли маблағҳо - RTGS (Real Time Gross Settlement) ва Амонатгоҳи марказии қоғазҳои киматнок - CSD (Central Securities Depository) аз ҷумлаи онҳо мебошанд. Инчунин, барои назорати самараноки фаъолияти низоми бонкӣ дар асоси технологияи муосир низоми ҷамъоварӣ, коркард ва таҳлили ҳисоботҳо татбиқ карда шуд.

Зимни мулоқот зикр гардид, ки низомҳои татбиқшуда инфрасохтори бахши бонкиро устувор гардонида, барои пешниҳод намудани хизматрасониҳои нави пардохтӣ аз ҷониби ташкилотҳои қарзии молиявӣ, аз ҷумла рушди пардохтҳои ғайринақдӣ дар савдои чакана бо истифода аз модули IFT (Instant Fund Transfer) мусоидат менамояд.

Давр навбати худ, ҷаноби Ян-Петер Олтерс аз ҳамкории сатҳи олии Ҳукумати Ҷумҳурии Тоҷикистон, аз ҷумла Бонки миллии Тоҷикистон бо Бонки Ҷаҳонӣ изҳори хушнудӣ карда, анҷомёбии лоиҳаи мазкурро мусбӣ арзёбӣ намуд ва иброз дошт, ки низомҳои татбиқшуда барои беҳтар гардидани хизматрасониҳои бонкӣ, рушди бахши хусусӣ ва баланд бардоштани мавқеи кишвар дар рейтинги “Пешбурди соҳибкорӣ” мусоидат менамояд.

Боиси тазаккур аст, ки низомҳои нав ба стандартҳои маъмули ҷаҳонӣ ҷавобгӯ буда, дорои як қатор бартариятҳо, аз қабили идоракунии навбатнокии пардохтҳо, набудани маҳдудият ба шумораи пардохтҳо дар давоми рӯзи амалиётӣ, модулҳои муосири интиқоли пардохтҳо дар реҷаи вақти воқеӣ, клиринг ва пардохтҳои босуръат мебошад.

Шуъбаи матбуот