Пешгирии беморӣ аз табобати он осонтар аст

Тавре аз рӯи маълумоти Ташкилоти умумиҷаҳонии тандурустӣ бармеояд, ҳамасола дар ҷаҳон ба ҳисоби миёна аз 350 то 450 миллион нафар одамон ба бемории пневмония (илтиҳоби шуш) гирифтор мешаванд, ки аз ин шумора ба ҳисоби миёна аз 3 то 7 миллион нафари онҳо мефавтанд, ки аз 1,5 то 4,0 фоизи шумораи умумии беморшудагонро ташкил медиҳад.

Инчунин, бинобар маълумоти расмии ташкилоти номбурда, фавт дар ҷаҳон аз ин беморӣ, пас аз бемориҳои дилу рагҳо, саратон, осебу заҳролудшавӣ ҷойи чорумро ишғол менамояд.

Дар Ҷумҳурии Тоҷикистон бошад, фавт аз бемории узвҳои нафаскашӣ, аз ҷумла пневмония (пас аз бемориҳои дилу рагҳо ва саратон) дар ҷойи сеюм қарор дошта, ҳамасола аз 7 ҳазор то 16 ҳазор нафар одамон ба бемории илтиҳоби шуш гирифтор мешаванд ва аз 130 то 650 нафар гирифторони ин беморӣ мефавтанд, ки аз 1,0 то 4 фоизи шумораи умумии беморшудагонро ташкил медиҳад.

Мавриди зикр аст, ки дар Ҷумҳурии Тоҷикистон гирифторон ба бемории илтиҳоби шуш дар 4 моҳи соли 2020 нисбат ба 4 моҳи соли 2019 аз 4 639 то 5 489 нафар, ё худ 850 нафар ва шумораи фавтидагон аз ин беморӣ аз 53 (1,1%) ба 95 нафар (1,7%) афзудааст.

Мусаллам аст, ки имрӯзҳо мардуми Тоҷикистон дар баробари дигар миллату халқҳои олам аз вазъи ногувори баамаломада – пандемияи сирояти коронавирус дар изтиробанд. Албатта, табиист, ки мо ҷузъе аз ҷомеаи ҷаҳонӣ ҳастем ва ин изтиробу нигарониҳои мо беҳуда нестанд, аммо, мо бояд бештар аз ҳарвақта муттаҳид бошем, мардумро ба оромӣ, сабурӣ ва таҳаммул даъват намоем, то ки ба эҳсос, ҳарос ва воҳимаву таҳлука гирифтор нашаванд!

Мо бояд ба муқобили ин беморӣ, бо саъю талош, яъне бо риояи чораҳои пешгирӣ, риояи ҳатмии гигиенаи шахсӣ, ҷамъиятӣ, парҳез аз рафтуомад ба ҷойҳои серодам мубориза бурда, барои баланд бардоштани масунияти бадани худ талош варзем.

Пешгирии ин беморӣ аз талошу кӯшиши ҳар шаҳрванди мамлакат ва ҳар нафаре, ки вориди кишвари мо мегардад, вобаста аст.

Ҳадаф ва мақсади аслии ҳамаи мо ҳифзи солимии миллат мебошад!

Шуъбаи матбуот