Ба хабарҳои носаҳеҳ ва носанҷида бовар накунед!

Имрӯз тамоми ҷаҳон бо бемории сироятии коронавируси COVID-19, ки барои табибон ва олимони соҳаи тиб нав мебошад, мубориза бурда истодаанд ва кӯшиш доранд, ки дар якҷоягӣ, даст ба дасти ҳамдигар ниҳода, ба он пирӯз шаванд. Аз ҷумла, дар Тоҷикистон, ки то 30 апрели соли 2020 ин бемории сироятӣ расман ба қайд гирифта нашуда буд, чораҳои пешгирии он дар сатҳи зарурӣ роҳандозӣ гардида буд. 30 апрели соли равон Ҷумҳурии Тоҷикистон низ расман аз гирифтор шудани чанд нафар аз шаҳрвандони кишвар ба бемории ҳамагири COVID-19 хабар дод.

Тоҷикистон пас аз дар кишвар ошкор гардидани ҳолати гирифторшавӣ ба ин беморӣ бо назардошти таҷрибаи дигар кишварҳо чораҳои пешгирӣ ва мубориза бо ин бемориро роҳандозӣ намуд ва тақвият бахшид. Мутаассифона, баъзе аз нафарони ҳангоматалаб аз пайдоиши ин бемории сироятӣ дар Тоҷикистон истифода карда, кӯшиш намуда истодаанд, ки мардумро ба таҳлука андозанд.

Аз ҷумла, рӯзҳои охир дар шабакаҳои иҷтимоӣ ва сомонаҳои ҳангомаҷӯ хабарҳои бардурӯғ дар хусуси гирифтори бемории илтиҳоби шуш (пневмания) ва бистарӣ гардидани Муовини якуми Раиси Бонки миллии Тоҷикистон Ҷамолиддин Нуралиев, Муовини Раиси Бонки миллии Тоҷикистон Ҳамидулло Машрабзода ва кормандони Бонки миллии Тоҷикистон маълумоти таҳрифшуда ва дур аз воқеият ба нашр расиданд.

Бонки миллии Тоҷикистон расман изҳор менамояд, ки ин хабарҳо асоси воқеӣ надошта, Муовини якуми Раиси Бонки миллии Тоҷикистон Ҷамолиддин Нуралиев, Муовини Раиси Бонки миллии Тоҷикистон Ҳамидулло Машрабзода сиҳату саломат ва дар дафтари корӣ аз пайи иҷрои вазифаҳои худ мебошанд.

Маврид ба зикр аст, ки маълумот дар хусуси бемории кормандон низ асоси воқеӣ надошта, кисме аз кормандони Бонки миллии Тоҷикистон дар рухсатии меҳнатии нақшавӣ қарор доранд ва кормандони боқимонда ба иҷрои вазифаҳои худ идома дода истодаанд.

Бонки миллии Тоҷикистон бори дигар аз ҳамаи шаҳрвандон эҳтиромона хоҳиш менамояд, ки ба ҳар гуна хабару гузоришҳои беасос ва ҳангоматалаб, ки ин шабу рӯз зиёд гардидаанд, бовар накарда, ба сарчашмаҳои расмӣ ва манбаъҳои эътимоднок такя намоянд. Зеро танҳо дар сурати нигоҳ доштани оромӣ метавон ба ҳар навъ беморӣ ғолиб омад.

Шуъбаи матбуот