Мулоқоти Ҳоким Холиқзода бо роҳбари Дафтари САҲА дар Душанбе

20 майи соли 2022 Раиси Бонки миллии Тоҷикистон Холиқзода Ҳоким Ҳикматулло бо иҷрокунандаи вазифаи роҳбари Дафтари барномаҳои Созмони амният ва ҳамкорӣ дар Аврупо (САҲА) дар Душанбе ҷаноби Вук Жугич мулоқот анҷом дод.

Раиси Бонки миллии Тоҷикистон Ҳоким Ҳикматулло роҳбари Дафтари САҲА дар Душанберо барои таъин шудан ба вазифаи пурмасъул табрик намуда, иброз дошт, ки рушди муназзами ҳамкориҳои дуҷониба бо ин ниҳоди байналмилалӣ таҳти роҳбарии ҷаноби Вук Жугич минбаъд низ тақвият дода мешавад.

Дар рафти мулоқот ҷонибҳо масъалаҳои рушди муносибатҳои Ҷумҳурии Тоҷикистон ва САҲА-ро дар самти муқовимат ба қонунигардонии даромадҳои бо роҳи ҷиноят бадастоварда, маблағгузории терроризм ва маблағгузории паҳнкунии силоҳи қатли ом (МҚД/МТ/МПСҚО) баррасӣ намуданд.

Дар ҷараёни вохӯрӣ, ҷонибҳо иҷрои Тавсияҳои Гурӯҳи татбиқи чораҳои молиявӣ алайҳи қонунигардонии даромадҳо (ФАТФ)-ро таъкид дошта, Раиси Бонки миллии Тоҷикистон қайд намуд, ки бо мақсади фароҳам овардани мутобиқати заминаи ҳуқуқӣ ба стандартҳои ФАТФ, дар давраи аз соли 2017 то ба имрӯз зиёда аз 30 қонун ва санадҳои зерқонунии Ҷумҳурии Тоҷикистон дар соҳаи МҚД/МТ/МПСҚО дар таҳрири нав ва тағйироту иловаҳо ба онҳо ворид карда шуданд.

Дар баробари ин ишора гардид, ки намояндагони Бонки миллии Тоҷикистон аз пешниҳодҳо ва навгониҳои ФАТФ, Гурӯҳи Авруосиё оид ба МҚД/МТ ва Гурӯҳи Эгмонт пайваста дар ҷараён буда, ҷиҳати омӯзиши таҷрибаи ҷаҳонӣ дар чорабиниҳои марбут ба шустушӯи пул, тадқиқоти ҷиноятҳои предикатӣ, ҷиноятҳои криптоасъорӣ ва пешгирии дигар омилҳои ҷиноятӣ дар якҷоягӣ бо намояндагони мақомоти ҳифзи ҳуқуқи кишвар иштирок менамоянд.

Ҷаноби Вук Жугич дар навбати худ барои пазироии самимӣ изҳори миннатдорӣ намуда, ҳавасмандии худро ҷиҳати тақвият додани ҳамкориҳои дуҷонибаи судманд ва ҳамзамон имконоти татбиқи барномаи ҷадид дар самти ҷамъоварӣ ва таҳлили маълумот барои Департаменти мониторинги молиявии назди Бонки миллии Тоҷикистон баён дошт. Дар баробари ин, роҳбари навтаъини Дафтари барномаҳои САҲА дар Душанбе имконоти иштирокоти ҷониби Тоҷикистон, аз ҷумла кормандони БМТ-ро дар ҷаласаҳои ФАТФ, Гурӯҳи Авруосиё ва Гурӯҳи Эгмонт матраҳ намуда, инчунин масъалаи ҷалби мутахассисонро дар курсҳои омӯзишии самти МҚД/МТ/МПСҚО иброз дошт.

Дар интиҳо ҷонибҳо изҳор доштанд, ки самтҳои ҳамкории муштарак ва масъалаҳои баррасишуда тавассути воҳидҳои ваколатдори ҳарду ҷониб пайгирӣ хоҳанд шуд.

Департаменти мониторинги молиявӣ