Коэффитсиентҳои молиявӣ ва аҳамияти онҳо дар идоракунии фаъолияти суғуртавӣ

Дар доираи кумаки техникии Бонки Осиёии рушд дар Бонки миллии Тоҷикистон тренинги омӯзишӣ бо иштироки намояндагони ташкилотҳои суғуртавии ҷумҳурии кишвар аз рӯи мавзӯи “Муҳиммияти коэффитсиентҳои молиявӣ дар идоракунии фаъолияти суғуртавӣ” баргузор гардид. 

Чорабинии мазкур аз ҷониби мушовири байналмилалӣ дар соҳаи суғурта – Родольфо Веҳрҳаҳн гузаронида шуда, бо рӯнамои муфассал оид ба нақш ва муҳимияти дороиҳо, сармоя ва захираҳои суғуртавиро дар фаъолияти ташкилотҳои суғуртавӣ (азнавсуғуртакунӣ), инчунин истифодабарии меъёрҳои молиявӣ дар фаъолияти суғуртавӣ ба самъи иштирокчиён расонида шуд.

Дар ҷараёни машғулияти омӯзишӣ ба диққати иштирокдорони он расонида шуд, ки захираҳои суғуртавӣ бояд дар сатҳи зарурӣ ташаккул дода шуда бошанд, то он ки анҷом додани пардохту ҷубронҳои имконпазири суғуртавиро таъмин карда тавонанд. Инчунин, муҳимияти дороиҳои пардохтпазири ташкилотҳои суғуртавӣ, ки барои пӯшонидани захираи зарарҳо заруранд, махсусан қайд гардида, таъкид шуд, ки пардохтпазирии дороиҳо бояд аз ҷониби ташкилоти суғуртавӣ (азнавсуғуртакунӣ) таъмин бошад.

Қобили қайд аст, ки дар қисмати ҷамъбастии семинари мазкур ба ҳозирин оид ба мавҷудияти хавфҳои суғуртавӣ, сармоягузорӣ ва амалиётӣ бо такя ба таҷрибаи муосири байналмилалӣ маълумоти муфассал пешниҳод шуда, таҳлилҳои молиявии бозори суғуртаи кишвар мавриди баррасӣ қарор гирифтанд.

Вобаста ба масъалаҳои матраҳшудаи тренинги омӯзишӣ ба суолҳои намояндагони ташкилотҳои суғуртавии кишвар посухҳои мушаххас дода шуданд.

Шуъбаи матбуоти
БМТ