Шӯрои машваратии бонкҳои марказӣ ва ҳимояи ҳуқуқи истеъмолкунандагони молиявӣ

23-24 ноябри соли 2017 дар Маркази таълимии Бонки миллии Тоҷикистон (ш. Гулистон) ҷаласаи 5-уми Шӯрои машваратии бонкҳои марказӣ (миллӣ) оид ба ҳимояи ҳуқуқи истеъмолкунандагони хизматрасониҳои молиявӣ бо иштироки намояндагони бонкҳои марказии (миллии) Ҷумҳуриҳои Қазоқистон, Арманистон, Русия, Белорус, Тоҷикистон ва Қирғизистон баргузор гардид.

Дар чорабинии мазкур аз ҷониби Бонки миллии Тоҷикистон Муовини Раиси Бонки миллии Тоҷикистон Салимова Лола ва намояндагони Идораи ҳимояи ҳуқуқҳои истеъмолкунандагони хизматрасониҳои молиявӣ ширкат варзиданд.

Дар ҷараёни ҷаласаи Шӯрои машваратии бонкҳои марказӣ иштирокдорон оид ба самтҳои гуногуни ҳимояи ҳуқуқҳои истеъмолкунандагони хизматрасониҳои молиявӣ, инчунин дар бораи пешниҳоди хизматрасониҳои молиявии электронӣ, баланд бардоштани маърифати молиявии аҳолӣ бо муаррифиномаҳои ҷолиб баромад карданд ва бо хотима ёфтани баромадҳо дар атрофи масъалаҳои зикршуда муҳокимаи пурмуҳтаво сурат гирифт. Иштирокдорони чорабинии мазкур аз таҷрибаи кишварҳои худ дар самти ҳимояи ҳуқуқҳои истеъмолкунандагони молиявӣ табодули таҷриба намуда, аз дастовардҳои худ дар ин раванд иттилоъ доданд.

Дар интиҳои ҷаласа аз ҷониби иштирокчиён нақшаи кории Шӯрои машваратии бонкҳои марказӣ (миллӣ) оид ба ҳимояи ҳуқуқи истеъмолкунандагони хизматрасониҳои молиявӣ барои солҳои 2017 -2018 тасдиқ гардида, дар он чунин самтҳои афзалиятноки фаъолияти Шӯрои мазкур муайян карда шуданд: рушди механизми то судии ҳалли баҳсҳо (медиатсия), таҳияи стандартҳои ҳадди аққал оид ба амонату пасандозҳо ва беруннавис аз суратҳисоби муштариён, баланд бардоштан сатҳи саводнокии молиявии мактаббачагон ва муҳоҷирони меҳнатӣ.

Шуъбаи матбуоти БМТ

Диданд: 0