1 декабри соли равон мулоқоти раиси Бонки миллии Тоҷикистон Фирдавс Толибзода бо ҳайати Дафтари ҳамкории иқтисодии Конфедератсияи Швейтсария (SECO) таҳти роҳбарии Дениз Люти - директори Дафтари ҳамкории Швейтсария дар Тоҷикистон ва Роналд Гиндрат - менеҷери барномаҳои минтақавии SECO баргузор гардид.
Зимни мулоқот раиси Бонки миллии Тоҷикистон Фирдавс Толибзода зикр намуд, ки низоми молиявии кишвар тайи солҳои охир ба марҳилаи нави рушди устувор ворид гардида, таҳкими низоми бонкӣ, рушди хизматрасониҳои рақамӣ, афзоиши фарогирии молиявӣ ва ҷалби сармояи хориҷӣ аз дастовардҳои муҳим ба шумор мераванд.
Таъкид гардид, ки лоиҳаи Бонки Ҷаҳонӣ «Тақвияти бахши молиявӣ дар Тоҷикистон» (марҳилаи II), ки бо дастгирии SECO амалӣ мегардад, ба татбиқи стандартҳои Basel II–III, таҳким бахшидани назорати ба хавф нигаронидашуда, ҳамгироии хавфҳои вобаста ба тағйирёбии иқлим, такмили инфрасохтори низоми пардохтҳо ва таъмини ҳимояи ҳуқуқҳои истеъмолкунандагони хизматрасониҳои молиявӣ мусоидат намуд.
Раиси Бонки миллии Тоҷикистон аз ҷониби SECO даъват намуд, ки дар такмили минбаъдаи низоми макропруденсиалӣ, таҳкими асосҳои ҳуқуқӣ дар самти ҳимояи истеъмолкунандагони хизматрасониҳои рақамӣ ва суғуртавӣ, ташкили барномаҳои омӯзишии иловагӣ, инчунин баррасии имконияти оғози марҳилаи III мусоидат намояд.
Дар идома, таҳти роҳбарии муовини раиси Бонки миллии Тоҷикистон Далер Муродализода ҷаласаи навбатии Кумитаи ҳамоҳангсозии техникии лоиҳаи Бонки Ҷаҳонӣ ва SECO «Тақвияти бахши молиявӣ дар Тоҷикистон» баргузор гардид.
Зимни ҷаласа натиҷаҳои санҷишҳои марҳилавӣ ва пешрафтҳои асосии лоиҳа тавассути рӯнамоҳо манзур гардида, масъалаҳои муҳимми такмили назорати бонкӣ, таҳлили хавфҳо, суботи молиявӣ, рушди бозори коғазҳои қиматнок, ҳимояи ҳуқуқҳои истеъмолкунандагони хизматрасониҳои молиявӣ ва беҳтарсозии инфрасохтори низоми пардохтҳо мавриди баррасӣ қарор гирифтанд.
Баргузории ҷаласаи Кумитаи ҳамоҳангсозии техникӣ ба ҷонибҳо имкон дод, ки ҳолати ҷории татбиқи лоиҳа, мушкилот ва амалҳои минбаъдаро баррасӣ намуда, барои суръат бахшидани ислоҳот ва тақвияти ҳамкорӣ миёни мақомоти кишвар ва шарикони рушд тавсияву пешниҳод манзур намоянд.
Дар анҷом, бо ишора ба ҳамкории судманди тулонӣ миёни Бонки миллии Тоҷикистон ва шарикони рушд изҳори умед карда шуд, ки робитаҳо минбаъд низ густариш ёфта, ба таҳкими устувории низоми молиявии кишвар мусоидат хоҳанд кард.
Шуъбаи матбуот
Диданд: 686
02.12.2025
