Дар мусобиқоти қаҳрамонии Осиё оид ба қаиқронӣ дар каноэ, ки рӯзҳои наздик дар шаҳри Самарқанд баргузор гардид, варзишгари тоҷик, дастпарвари Маркази варзишии Бонки миллии Тоҷикистон Шаҳриёр Даминов ширкат варзид ва сазовори медали биринҷӣ гардид.  
    Тавре Нодир Сафаров, мураббии дастаи мунтахаби қаиқронони Тоҷикистон изҳор намуд, дар ин мусобиқаи минтақавӣ, ки дафъаи 15-ум баргузор шуд, қариб 500 варзишгар аз 22 кишвари дунё иштирок доштанд. Тоҷикистонро дар мусобиқоти қаҳрамонии Осиё 13 варзишгар, 1 довар ва 3 мураббӣ намояндагӣ карданд.Шаҳриёр Даминов (дар байн) ҳамроҳи устодонаш Нодир Сафаров ва Ҳасан Шарифов (аз чапу рост) дар каноэи яккаса дар масофаи 200 метр бо натиҷаи 00:43.989 мақоми сеюмро соҳиб шуд.

    Мақоми аввалро бо натиҷаи 00:40.648 варзишгари Қазоқистон Сергей Емелянов ва ҷойи дуюмро бо натиҷаи 00:42.165 Элёр Мамадалиев аз Узбакистон сазовор гаштанд.  
    Бояд гуфт, ки варзишгарони 8 кишвари олам соҳиби медалҳои мусобиқот шуданд, ки Тоҷикистон низ аз ҷумлаи онҳост.
    Ҳамчунин қобили қайд аст, ки медали ба дастовардаи Шаҳриёр Даминов нахустин медали қаиқронони тоҷик дар мусобиқоти қаҳрамонии Осиё ба шумор меравад.
    Нодир Сафаров, мураббии дастаи мунтахаби қаиқронони Тоҷикистон ки дар ин мусобиқот ба ҳайси довар ширкат дошт, меъёрҳои муқарраршудаи довари дараҷаи байналмилалиро ба ҷо овард ва барои гирифтани ин унвон номзадии ӯ ба комиссияи Федератсияи байналмилалии қаиқронӣ пешниҳод шуд.
    Дар ҷаҳорчӯбаи мусобиқаи номбурда, дар шаҳри Самарқанд ҷаласаи XVI Конфедератсияи қаиқронони Осиё барпо гардид, ки дар рафти он ҷаноби Масанори Нарита аз Ҷопон дигарбора раиси ин созмони минтақавӣ интихоб шуд.

Хадамоти матбуоти
БМТ