Мукаммалсозии бахши омори берунӣ баррасӣ гардид

Дар Маркази таълимии Бонки миллии Тоҷикистон дар ш. Қайроқуми вилояти Суғд 24-28 августи соли равон марҳилаи дуюми семинари омӯзишии байналмилалӣ дар мавзӯи “Мукаммалсозии бахши омори берунӣ”, ки бо ибтикори Хазинаи байналмилалии асъор ва дастгирии молиявии Ҳукумати Швейтсария ташкил шудааст, баргузор гардид.

Дар семинар мутахассисони Вазоратҳои молия, Агентии омор ва Бонкҳои миллии Озорбойҷон, Гурҷистон, Қирғизистон, Молдова ва Тоҷикистон даъват ва ширкат варзиданд.

Семинари байналмилалӣ бо суханони ифтитоҳии муовини Раиси Бонки миллии Тоҷикистон Лола Салимова ба кори худ шурӯъ намуд.

Тавре дар рафти ҷамъомади мазкур маълум гардид, ҳадаф аз баргузории семинар, баррасӣ ва муҳокимаи масъалаҳои вобаста ба сифати омор, тартиб додани тавозуни пардохт ва мавқеи сармоягузории байналмилалӣ ба шумор меравад.

Хазинаи байналмилалии асъор ба иштирокдорони семинари мазкур имкон фароҳам овард, то ки онҳо оид ба дастовардҳои худ дар бахши такмилсозии бахши омори берунӣ бо муаррифиҳои хеш баромад намоянд.

Мутахассисони Тоҷикистон низ дар навбати худ бо истифода аз имконияти бадастомада дар назди ҳозирин оид ба комёбиҳои хеш дар ин самт ба таври муфассал суханронӣ карданд.

Намояндаи Хазинаи байналмилалии асъор дар қисмати натиҷагирии кори семинар ба фаъолияти Ҷумҳурии Тоҷикистон дар раванди мукаммал намудани бахши омори берунӣ ва иҷрои вазифаҳо баҳои мусбат дода, ҳамзамон иброз намуд, ки ин натиҷаҳо ба таври оҷилӣ ва босифат иҷро гардидаанд.

Қобили қайд аст, ки аз ҷониби Хазинаи байналмилалии асъор ҳамчунин барои идомаи кор ҷиҳати мукаммал намудани бахши омори берунӣ, ки дорои аҳамияти махсус мебошад ва дар марҳилаи ҷаҳонишавӣ зарур аст, тавсияҳо дода шуд.

Ёдовар мешавем, ки марҳилаи якуми семинари омӯзишии байналмилалӣ ҷанде пеш дар Ҷумҳурии Қирғизистон баргузор шуда буд.

Дар назар аст, ки марҳилаи сеюми семинари номбурда бо ширкати васеи иштирокдорон аз мамолики дунё дар Ҷумҳурии Озарбойҷон баргузор хоҳад шуд.

Хадамоти матбуоти  
БМТ