Ташрифи ҳайати Фонди Авруосиёии устуворӣ ва рушд ба БМТ

2 августи соли 2017 Муовини якуми Раиси Бонки миллии Тоҷикистон Ҷамолиддин Нуралиев гурӯҳи намояндагони Бонки Авруосиёии Рушдро дар доираи татбиқи барномаи ислоҳотҳое, ки бо дастгирии молиявии Фонди Авруосиёии устуворӣ ва рушд (ФАУР) амалӣ мегардад, ба ҳузур пазируфт.

Мулоқоти мазкур дар доираи иҷроиш ва татбиқи шартҳои транши сеюми қарзи молиявии дастгирии Буҷети давлатии Ҷумҳурии Тоҷикистон аз ҳисоби Фонди мазкур, дар чаҳорчӯбаи Номгӯи чорабиниҳои сиёсати иқтисодӣ баргузор гардид.

Дар рафти вохӯрӣ ҷонибҳо оид ба нишондиҳандаҳои асосии макроиқтисодӣ ва рушди минбаъдаи воқеии иқтисодиёт ибрози назар намуда, масоили вазъи ҷории макроиқтисодӣ ва дурнамои миёнамуҳлат ба он, имкониятҳои эҳтимолии ворид намудани ислоҳотҳо ба қоидаҳои муқаррар кардани қурби расмии мубодила, таҷдид кардани қиматҳои ҳудуди нишондиҳандаҳои монетарӣ ва дигар имкониятҳои мавҷуда барои ҳамкориҳои минбаъдаро муҳокима намуданд.

Зимни мулоқот Муовини якуми Раиси Бонки миллии Тоҷикистон Ҷамолиддин Нуралиев изҳор дошт, ки барномаи мазкур барои дастгирии Буҷети давлатии Ҷумҳурии Тоҷикистон муҳим буда, Бонки миллии Тоҷикистон барои ҳамкорӣ дар ин самт бо Фонди Авруосиёии устуворӣ ва рушд омода мебошад.

Дар навбати худ, директори Гурӯҳи лоиҳаи қарздиҳии молиявии Фонди Авруосиёгии устуворӣ ва рушд Алишер Мирзоев ба Бонки миллии Тоҷикистон барои мусоидат ва омодагӣ ба ҳамкорӣ изҳори миннатдорӣ намуда, вобаста ба масъалаҳои дар боло зикргашта, андешаҳои худро пешниҳод намуд.

Маврид ба зикр аст, ки дар мулоқоти мазкур инчунин як қатор мудирони аршад ва мутахассисони Гурӯҳи лоиҳаи қарздиҳии молиявии Фонди Авруосиёии устуворӣ ва рушд Тигран Костанян, Наталя Писарева, Элвира Курманалиева, Павел Бирюков, Анатолий Трифонов, Ян Рудаковский, сардори идораи молияи Вазорати молияи Ҷумҳурии Тоҷикистон Азиз Ашуриён ва роҳбарони воҳидҳои сохтории дахлдори Бонки миллии Тоҷикистон ширкат доштанд.

Шуъбаи матбуоти БМТ