Соҳаи суғурта ба талаботи стандартҳои байналмилалӣ мутобиқ гардонида мешавад

16 августи соли равон, таҳти роҳбарии муовини Раиси Бонки миллии Тоҷикистон Ҳамидулло Машрабзода бо иштироки намояндагони ташкилотҳои суғуртаи кишвар вобаста ба вазъи имрӯзаи бозори суғурта дар ҷумҳурӣ ҷаласаи корӣ баргузор гардид.

Дар оғози ҷаласа муовини Раиси Бонки миллии Тоҷикистон Машрабзода Ҳ.М. зикр намуд, азбаски сохторҳои назорати суғуртавии давлатҳо - аъзои ИДМ дар ҳайати Бонкҳои марказии ин давлатҳо фаъолият доранд, Хадамоти давлатии назорати суғуртавии назди Вазорати молияи Ҷумҳурии Тоҷикистон низ дар асоси қарори Ҳукумати Ҷумҳурии Тоҷикистон аз 1 январи соли 2016, №408 “Дар бораи масъалаҳои Хадамоти давлатии назорати суғуртавӣ” ва Фармони Президенти Ҷумҳурии Тоҷикистон аз 13 марти соли 2017, №851 “Дар бораи ба БМТ вогузор кардани ваколати назорати суғуртавӣ” ба сохтори Бонки миллии Тоҷикистон гузаронида шуда, минбаъд фаъолияти Идораи назорати суғуртавӣ ба талаботи стандартҳои байналмилалӣ мутобиқ гардонида мешавад.

Сипас, Ҳамидулло Машрабзода аз суханронии Асосгузори сулҳу Ваҳдати миллӣ - Пешвои миллат, Президенти Ҷумҳурии Тоҷикистон Эмомалӣ Раҳмон дар ҷаласаи сездаҳуми Шўрои машваратии назди Президенти Ҷумҳурии Тоҷикистон оид ба беҳтар намудани фазои сармоягузорӣ дар соҳаи суғурта иқтибос овард, ки “таҷрибаи пешқадами давлатҳои дунё дар ин самт нишон медиҳад, ки амалӣ намудани хизматрасониҳои суғуртаи ҳатмӣ аз ҷониби ширкатҳои хусусии суғуртавӣ барои рушди рақобат дар бозори суғурта, пайдо шудани хизматрасониҳои нави суғуртавӣ, баланд гардидани сифати онҳо ва самаранокии фаъолияти ширкатҳои суғуртавӣ мусоидат менамояд”. Ӯ зикр намуд, ки бахши суғурта дар ташаккул ва рушди бозорҳои сармоя нақши ҷиддӣ дорад, зеро он яке аз харидорони асосии коғазҳои қиматноки давлатию корпоративӣ гашта, барои муҳайё намудани маблағҳои озод ва ба соҳаҳои дигари иқтисодиёт сармоягузорӣ намудани онҳо метавонад кўмак намояд.

Дар рафти ҷаласа қайд гардид, ки мавҷудияти талаботи ҷамъиятӣ ба хизматрасониҳои суғурта, мавҷудияти ширкатҳои суғуртакунанда ва назорати давлатӣ аз рӯи фаъолияти суғурта шартҳои асосӣ ва зарурии ташкили фазои ягонаи суғурта дар ҳар давлат мебошанд. Маҳз ба туфайли мавҷудияти ин се шарт, соҳаи суғурта ба яке аз институтҳои муҳими ҷамъиятӣ мубаддал гашта, механизм ё худ фишанги асосии инфрасохтори бозор мегардад.

Зимни муҳокимаронӣ иштирокдорон ба масъалаҳои гуногуни рушди бахши суғурта таваҷҷуҳ зоҳир намуда, вобаста ба мушкилоти ҷорӣ ва имкониятҳои мавҷуда андешаҳои худро баён доштанд. Таъкид гардид, ки камбудиҳои ҷойдошта дар бахши мазкур ислоҳ гашта, ташкилотҳои суғуртавӣ фаъолияти худро мувофиқи талаботҳои иҷозатномадиҳӣ ва қоидаҳои намудҳои суғуртаи ба онҳо иҷозатдодашуда дар асоси рақобати солим ба роҳ мемонанд.

Шуъбаи матбуоти БМТ