Мулоқот бо ҳайати Бонки рушди Осиё

18 октябри соли 2017 Муовини якуми Раиси Бонки миллии Тоҷикистон Ҷамолиддин Нуралиев бо намояндаи доимии Бонки рушди Осиё дар Тоҷикистон ҷаноби Прадип Сривастава мулоқоти корӣ доир намуд.

Дар ҷараёни вохӯрӣ Муовини якуми Раиси Бонки миллии Тоҷикистон Ҷамолиддин Нуралиев ҷаноби Прадип Сриваставаро бо вазъи макроиқтисодӣ ва тадбирҳои андешидаи Бонки миллии Тоҷикистон нисбати низоми бонкии Ҷумҳурии Тоҷикистон шинос намуда, барои тавсеа бахшидани ҳамкорӣ дар бахшҳои гуногуни низоми бонкӣ, аз ҷумла васеъ намудани имкониятҳои сиёсати монетарӣ ва фишангҳои муосир, ки барои гузариши ботадриҷ ба реҷаи муосири пулию қарзӣ – ҳадафгирии таваррум заминаи мусоид фароҳам меоварад, изҳори андеша намуд. Ҷамолиддин Нуралиев барои расонидани кӯмаки техникӣ дар ин самтҳо тариқи доир намудани тренингҳо ҷиҳати доир намудани таҳлилу тадқиқотҳои минбаъда, инчунин барои мубодилаи таҷрибаи кормандони Бонки миллии Тоҷикистон дар бонкҳои марказии ҳамкор даъват ба амал овард. 

Намояндаи доимии Бонки рушди Осиё дар Тоҷикистон Прадип Сривастава дар навбати худ иброз дошт, ки аз ҳамкориҳои дуҷониба ва судманд бо Бонки миллии Тоҷикистон қаноатманд аст ва омодагии ташкилоти худро барои дастгирӣ ва идома додани ҳамкориҳо дар ин самт иброз намуд.

Дар интиҳои мулоқоти судманд ҷонибҳо ба хулоса омаданд, ки минбаъд низ ҳамкориро дар бахши беҳбуд бахшидани низоми бонкӣ, татбиқи ислоҳот дар бахшҳои монетарӣ ва фискалӣ идома хоҳанд дод. 

Ёдовар мешавем, ки дар вохӯрӣ инчунин иқтисодчии Намояндагии доимии Бонки рушди Осиё дар Тоҷикистон Муҳаммад Бобоев ва роҳбарони воҳидҳои сохтории Бонки миллии Тоҷикистон ширкат варзиданд.

Шуъбаи матбуоти БМТ