17-19 октябри соли 2017 дар Маркази таълимии Бонки миллии Тоҷикистон (шаҳри Гулистон) дар доираи Барномаи таълим ва такмили ихтисоси кормандони бонкҳои марказии (миллии) давлатҳои аъзои Ҷомеаи иқтисодии АврОсиё ва Бонки миллии Тоҷикистон дар мавзӯи “Ташкили инфрасохтори бозори маблағгузории хурд ва кооператсияи қарзҳо” семинари байналхалқӣ гузаронида шуд.
Муовини Раиси Бонки миллии Тоҷикистон Сироҷиддин Икромӣ кори семинарро оғоз бахшида, изҳор дошт, ки дар вазъи феълии хоҷагидорӣ ташкили инфрасохтори бозори маблағгузории хурд ва кооператсияи қарзҳо мавзӯи ҷолиб буда, ҳам барои низоми бонкии ҷаҳонӣ ва ҳам барои низоми бонкии давлатҳои алоҳида муҳим арзёбӣ мегардад. Аз ин рӯ, зикр гардид, ки чорабинии мазкур иқдоми муҳимми амалия дар сафарбар намудани имкониятҳои зеҳнии бахши бонкӣ мебошад.
Иштирокдорони семинар дар рафти машғулият меъёрҳои молиявии ташкилотҳои маблағгузории хурд, бозори маблағгузории хурд, талаботҳои ба танзим даровардани ташкилотҳои маблағгузории хурд ва кооператсияи қарзҳо, рушди низоми кафолатдиҳӣ дар бозори копператсияи қарзҳоро муҳокимаронӣ намуданд.
Муовини Раиси БМТ Сироҷиддин Икромӣ инчунин таваҷҷуҳи иштирокдоронро ба баррасӣ намудани масоили низоми идоракунии хавфҳо дар ташкилотҳои қарзӣ, хусусан хавфи қарзӣ, хавфи амалиётӣ, хавфҳои асъорӣ ва истифодаи фишангҳои анъанавии молиявӣ барои суғуртаи хавфҳо, аз ҷумла форвард, фючерс, своп, опсион ва гузоштани масъулияти хавфи асъорӣ ба зиммаи муштарӣ аз таҷрибаи бонкҳои иштирокдор ҷалб намуд.
Қобили қайд аст, ки дар доираи Барномаи таълим ва такмили ихтисоси кормандони бонкҳои марказии (миллии) давлатҳои аъзои Ҷомеаи иқтисодии АврОсиё (Русия, Белорусия, Қазоқистон, Қирғизистон, Арманистон) ва Тоҷикистон, бо мақсади табодули афкору таҷриба дар масъалаҳои гуногуни низоми бонкӣ, барои мутахассисон пайваста семинару мизҳои мудаввар гузаронида шуда, баъдан таҷрибаҳои пешқадам дар фаъолияти кории бонкҳои марказӣ (миллӣ) мавриди истифода қарор дода мешаванд.
Шуъбаи матбуоти БМТ