Мулоқоти Раиси БМТ бо Раиси Бонки рушди АврОсиё

29 январи соли 2018 мулоқоти Раиси Бонки миллии Тоҷикистон Ҷамшед Нурмаҳмадзода бо ҳайати намояндагии Бонки рушди АврОсиё (БРАО) таҳти роҳбарии Раиси Раёсати бонки мазкур ҷаноби Андрей Белянинов баргузор гардид.

Дар рафти мулоқот ҷонибҳо масъалаҳои ҷоннок намудани ҳамкориҳои дуҷонибаи судманд дар самти рушди иқтисод ва низоми бонкиро мавриди баррасӣ қарор доданд.

Раиси Бонки миллии Тоҷикистон Ҷамшед Нурмаҳмадзода Андрей Беляниновро ба вазифаи Раиси Раёсати Бонки рушди АврОсиё таъйин шуданаш табрику таҳният гуфта, барои рушд додани муносибатҳои дуҷониба дар сатҳи нави ҳамкорӣ изҳори умед кард. Зимни мулоқот Ҷамшед Нурмаҳмадзода ҳайати Бонки рушди АврОсиёро бо вазъи феълии низоми бонкии кишвар шинос намуда, изҳор дошт, ки марҳилаи солимгардонии низоми бонкӣ барои Ҷумҳурии Тоҷикистон оғоз ёфт.

Дар навбати худ, Раиси Раёсати Бонки рушди АврОсиё Андрей Белянинов таваҷҷуҳи асосиро барои мусоидат намудан дар самти қарздиҳӣ ба бахши хусусӣ, имкониятҳои кушодани суратҳисобҳои Бонки рушди АврОсиё дар Бонки миллии Тоҷикистон, гузаронидани амалиётҳои СВОП ва дигар масъалаҳои низоми бонкӣ ҷалб намуд.

Дар идома Раиси Бонки миллии Тоҷикистон Ҷамшед Нурмаҳмадзода зикр намуд, ки таклифу пешниҳодҳо оид ба масъалаҳои зикршуда пурра омӯхта шуда, вобаста ба имкониятҳои мавҷуда дар самти ба сатҳи нав гузаронидани ҳамкориҳо ва дастгирии низоми бонкии кишвар мавриди пешниҳод қарор дода мешаванд.

Қобили қайд аст, ки мулоқоти мазкур дар фазои мусоид ва ҳамдигарфаҳмӣ доир гардида, дар он инчунин, Муовини Раиси Бонки миллии Тоҷикистон Сироҷиддин Икромӣ, Директори намояндагии Бонки рушди АврОсиё дар Тоҷикистон Рашид Қодиров, сардори шуъбаи тадорукот-бозрасии Бонки рушди АврОсиё Антон Мартинюк, сардори шуъбаи равобити байналмилалӣ ва ташрифоти Бонки рушди АврОсиё Михаил Панченко, намояндагони Вазорати молияи ҶТ ва роҳбарони воҳидҳои сохтории Бонки миллии Тоҷикистон ширкат варзиданд.

Шуъбаи матбуоти БМТ