Бонки миллӣ ва Бонки ҷаҳонӣ Стратегияи ҳамкориро муҳокима намуданд

19 марти соли 2018 Роҳбарияти Бонки миллии Тоҷикистон бо ҳайати Намояндагии доимии Бонки ҷаҳонӣ дар Тоҷикистон мулоқоти корӣ анҷом доданд. Машварати мазкур таҳти роҳбарии Муовини якуми Раиси Бонки миллии Тоҷикистон Ҷамолиддин Нуралиев, бо иштироки муовинони Раиси БМТ Сироҷиддин Икромӣ ва Ҳамидулло Машрабзода ва Намояндаи доимии Бонки ҷаҳонӣ дар Тоҷикистон Ян Питер Олтерс сурат гирифт.

Дар рафти мулоқот ҷонибҳо дар баробари баррасии масъалаҳои таҳким бахшидани ҳамкориҳо дар самти татбиқи лоиҳаҳо ва барномаҳои бахши молиявӣ, инчунин оид ба рафти амалишавии лоиҳаи “Баланд бардоштани рақобатпазирии бахши хусусӣ” табодули назар намуданд.

Муовини якуми Раиси Бонки миллии Тоҷикистон Ҷамолиддин Нуралиев аз ҳамкориҳои мутақобилаи судманд бо Бонки Ҷаҳонӣ изҳори қаноатмандӣ намуда, барои боз ҳам вусъат бахшидани муносибатҳои дуҷонибаи муфид дар бахши низоми бонкӣ изҳори ҳавасмандӣ кард.

Намояндаи доимии Бонки Ҷаҳонӣ дар Тоҷикистон Ян Питер Олтерс дар навбати худ омодагии хешро барои вусъат бахшидани муносибатҳои ҳамкорӣ дар оянда изҳор карда, инчунин татбиқи лоиҳаҳои муштаракро ҷиҳати устувор намудани бахши молиявии Ҷумҳурии Тоҷикистон мавриди таваҷҷуҳ қарор дод. Зимни суханронӣ Ян Питер Олтерс ҳамзамон оид ба лоиҳаи Стратегияи ҳамкорӣ миёни Бонки Ҷаҳонӣ ва Ҷумҳурии Тоҷикистон, ки барои солҳои 2019-2023 пешбинӣ мешавад, маълумот дод. Дар ҷамъбасти мулоқот зикр карда шуд, ки масъалаи мазкур дар машварати корӣ бо иштироки намояндагони мақомоти давлатӣ ва Бонки ҷаҳонӣ дар ояндаи наздик баррасӣ хоҳад шуд.

Қобили қайд аст, ки дар мулоқоти мазкур аз ҷониби Намояндагии доимии Бонки ҷаҳонӣ дар Тоҷикистон ҳамоҳангсози лоиҳаҳо Зарина Абдулалиева, сармутахассиси бахши молиявӣ (IFC) Зарина Одинаева, сармутахассиси бахши хусусӣ (IFC) Мадина Нурматова ва роҳбарони як қатор воҳидҳои сохтории Бонки миллии Тоҷикистон ширкат намуданд.

Шуъбаи матбуоти БМТ