Маблағгузории хурд тибқи принсипҳои маблағгузории исломӣ

Дар доираи Лоиҳаи Барномаи саводнокии касбӣ барои паст намудани сатҳи камбизоатӣ (VOLIP), таърихи 29-30 марти соли 2018, Бонки миллии Тоҷикистон дар ҳамбастагӣ бо Маркази татбиқи лоиҳаи сохтмон ва таҷдиди мактабҳои миёна дар назди Вазорати маориф ва илми ҶТ барои кормандони ташкилотҳои қарзии шаҳру ноҳияҳои Душанбе, Ҳисор, Левакант, Норак, Шаҳринав, Файзобод, Нуробод, Хуросон, Ҳамадонӣ, Муъминобод ва Зафаробод семинари омӯзишӣ оид ба маблағгузории хурд мувофиқи принсипҳои маблағгузории исломӣ баргузор намуд.

Муовини Раиси БМТ Сироҷиддин Икромӣ зимни суханронии ифтитоҳӣ вобаста ба моҳияти низоми бонкдории исломӣ – ҳамчун ягона низоми молиявие, ки новобаста аз таҳаввулоти сиёсиву иҷтимоӣ дар асоси қоидаву рукнҳои динӣ ва қонунҳои шариат фаъолият мекунад ҳарф зада, зикр намуд, ки маҳз бо мақсади иҷрои талаботи Қонуни ҶТ “Дар бораи фаъолияти бонкии исломӣ” дар назди Бонки миллии Тоҷикистон Гурӯҳи корӣ оид ба омода намудани лоиҳаи санадҳои меъёрии ҳуқуқӣ барои фаъолияти бонкии исломӣ таъсис дода шудааст.

Муовини Раиси Бонки миллии Тоҷикистон ҳамзамон қайд намуд, ки “Мақсади асосии Барномаи VOLIP паст намудани сатҳи камбизоатӣ бо роҳи беҳтар намудани саводнокии касбии ҷавонон ва тақвияти малакаву маҳорати амалии занҳои коргари беихтисос, дастгирии молиявии онҳо ҷиҳати таъмин ба шуғл ва гирифтани даромад мебошад. Дар доираи лоиҳаи номбурда маблағгузории гурӯҳҳои мақсадноки аҳолӣ, хусусан, дар деҳот, тибқи принсипҳои маблағгузории исломӣ ба воситаи ташкилотҳои қарзии интихобгардида дар минтақаҳо пешбинӣ шудааст. Ташкил намудани дастгирии баҳрабарандагон тибқи принсипҳои маблағгузории исломӣ мақсади асосии Лоиҳа мебошад. Умед дорем, ки семинари мазкур иқдоми амалӣ барои воқиф намудани мардум аз меъёрҳои бонкдории исломӣ гардида, ба рушди минбаъдаи он дар кишвар шароити мусоид фароҳам меорад”.

Сипас, мутахассисони Бонки миллии Тоҷикистон ба иштирокдорон оид ба раванди амалишавии маблағгузории хурди исломӣ дар доираи “Барномаи саводнокии касбӣ барои паст намудани сатҳи камбизоатӣ дар Тоҷикистон”, намудҳои маблағгузории хурди исломӣ ва имкониятҳои амалии истифодаи он дар шароити Тоҷикистон ва ҷараёни татбиқи низоми бонкдории исломӣ аз ҷониби БМТ маълумот доданд. Аз ҷумла, бо назардошти он, ки маблағҳои Барномаи VOLIP дар асоси амалиёти Муробаҳа ва Салам амалӣ мегарданд, вобаста ба ин намуди амалиётҳои маблағгузорӣ, хусусиятҳои асосӣ, раванди амалиёт, санадҳо, тарзи ҳисоб ва бозпардохти маблағ рӯнамоиҳо (презентатсия) пешниҳод гардиданд.

Дар рафти машғулиятҳои амалӣ ба иштирокдорон муяссар гардид, ки оид ба намудҳои маблағгузории исломӣ, нақшаҳо дар заминаи принсипҳои маблағгузории хурди исломӣ ва ташкили фаъолияти бонкӣ ҷиҳати қарздиҳии хурди исломӣ дар доираи “Барномаи саводнокии касбӣ барои паст намудани сатҳи камбизоатӣ дар Тоҷикистон” маълумот гиранд.

Дар қисмати ҷамъбастии барномаи омӯзишӣ ҳамоҳангсози Барномаи VOLIP Исроил Исмоилов оид ба нақшаи чорабиниҳо ҷиҳати таъмини татбиқи бомуваффақияти Барномаи мазкур дар заминаи беҳтар намудани раванди қарздиҳии хурд барои соли 2018 маърӯза намуд.

Лозим ба ёдоварист, ки маблағи лоиҳаи мазкур тавассути ташкилотҳои қарзии ватанӣ (БДА “Амонатбонк”, ҶСК “Бонки Эсхата”, ҶСП “Спитамен Бонк”, ҶСП “Бонки байналмилалии Тоҷикистон”, ҶСК ”Коммерсбонки Тоҷикистон”, ҶСП ТАҚХ “Имон Интернешнл”, ҶСП ТАҚХ “Ҳумо”, ҶДММ ТАҚХ “Арванд”) амалӣ карда мешаванд. Айни ҳол, лоиҳаи Барномаи саводнокии касбӣ барои паст намудани сатҳи камбизоатӣ дар Тоҷикистон дар 11 шаҳру ноҳияҳои ҷумҳурӣ, аз ҷумла, шаҳрҳои Душанбе, Ҳисор, Норак, Сарбанд ва ноҳияҳои Шаҳринав, Файзобод, Нуробод, Хуросон, Муъминобод, Ҳамадонӣ ва Зафаробод амалӣ шуда истодааст.

Шуъбаи матбуоти БМТ