Пешбурди тарзи ҳаёти солим –таъмини ҷомеаи солим

2 июли соли 2018 дар ҳамбастагӣ бо Маркази ҷумҳуриявии пешгирӣ ва мубориза бар зидди Вируси норасоии масунияти одам (ВИЧ/СПИД)-и Вазорати тандурустӣ ва ҳифзи иҷтимоии аҳолии ҶТ дар Бонки миллии Тоҷикистон бо иштироки кормандон машварати корӣ баргузор гардид.

Дар оғози чорабинӣ, сардори Идораи кормандони бонк Давлаҳмад Гадоев дар хусуси пешбурди тарзи ҳаёти солим суханронӣ намуда, қайд кард, ки саломатии инсон ҳамчун сарвати бебаҳо, омили асосӣ ва муҳимми мавҷудияти одам маҳсуб ёфта, ояндаи ҷомеа ба шахсиятҳои солим вобастагии сахт дорад.

Сипас, аз ҷониби мутахассисони Маркази ҷумҳуриявии пешгирӣ ва мубориза бар зидди Вируси норасоии масунияти одам барои иштирокдорон оид ба омилҳои сироятёбӣ ва роҳҳои пешгирӣ намудани он маълумоти муфассал пешниҳод карда шуд.

Зимни маърӯза инчунин қайд гардид, ки бо назардошти оқибатҳои нохуш доштани ин намуди беморӣ, ҷиҳати пешгирӣ ва мубориза бо он дар Ҷумҳурии Тоҷикистон “Барномаи миллӣ оид ба муқовимат ба эпидемияи вируси норасоии масунияти одам дар Ҷумҳурии Тоҷикистон барои солҳои 2017-2020” қабул гардида, Нақшаи татбиқи барномаи мазкур таҳия ва татбиқ шуда истодааст.

Мудири шуъбаи арзёбӣ ва баҳодиҳии Маркази ҷумҳуриявии мубориза бар зидди Вируси норасоии масунияти одам Тоҳир Шерхонов дар охири ҷамъомад таъкид намуд, ки бо мақсади пешгирии паҳншавии ин вируси хатарнок дар ҷомеа, дар саросари кишвар зиёда аз панҷоҳ нуқтаи Маркази ҷумҳуриявии пешгирӣ ва мубориза бар зидди Вируси норасоии масунияти одам фаъолият доранд ва хоҳишмандон метавонанд дар ин нуқтаҳо барои санҷиш тест супоранд ва ё маслиҳат ва маводи иттилоотиро дастрас намоянд.

Маврид ба зикр аст, ки ҳадаф аз баргузории ҳамоиши мазкур бурдани корҳои фаҳмондадиҳӣ оид ба натиҷаҳои номатлуби Вируси норасоии масунияти одам (ВИЧ/СПИД) буда, ба ин васила мубориза дар самти пешгирӣ алайҳи ин намуди беморӣ ҷоннок карда мешаванд.

Шуъбаи матбуоти БМТ