Бойгонии ахбор
Семинари омӯзишӣ дар мавзӯи “Муҳосибот барои маблағгузории исломӣ”
30 июли соли 2018 дар Бонки миллии Тоҷикистон семинари омӯзишӣ таҳти унвони “Муҳосибот барои маблағгузории исломӣ” ва муҳокимаи корҳои анҷомшуда дар доираи марҳилаи III-юми ҳамкорӣ бо машваратчиёни Шӯрои машваратии “ISRA Consultancy Sdn” ва Гурӯҳи корӣ (муҳокимаи санадҳои меъёрии ҳуқуқӣ оид ба тартиби танзими фаъолияти ташкилотҳои қарзии исломӣ), ки бо ташаббуси Бонки миллии Тоҷикистон ва Бонки Исломии Рушд барои кормандони низоми бонкии мамлакат роҳандозӣ карда шуд, ба кори худ оғоз намуд.
Муовини Раиси Бонки миллии Тоҷикистон Машрабзода Ҳамидулло чорабинии мазкурро ҳусни оғоз бахшида, қайд кард, ки фаъолияти ташкилоти қарзии исломӣ хусусияти ба худ хос дошта, танзиму назорати он бояд тибқи принсипҳои маблағгузории исломӣ, аз ҷумла стандартҳои бонкдории исломӣ роҳандозӣ карда шаванд. “Айни замон, низоми бонкдории исломӣ дар ҷаҳон мавқеи хосро пайдо намуда, диққати низоми бонкии анъанавиро ба худ ҷалб кардааст. Семинари мазкур иқдоми амалии сафарбар кардани қувваи зеҳнӣ ҷиҳати воқиф шудан аз меъёрҳои бонкдории исломӣ буда, ба рушди минбаъдаи он дар Ҷумҳурии Тоҷикистон тақвият мебахшад”-изҳор дошт Машрабзода Ҳ.
Бояд қайд кард, ки дар ҷараёни семинарҳои қаблӣ мутахассисони низоми бонкӣ масъалаҳои гуногун, аз ҷумла, ташкили ҳисобдорӣ ва аудит барои созмонҳои молиявии исломӣ, масъалаҳои шариат ва чорчӯбаи қонунгузорӣ дар ин гуна ташкилотҳо, нақши машваратчиёни шариат ва талаботи фаъолият дар он, меъёрҳо ва принсипҳои асосии ҷорӣ кардани меъёрҳои дахлдори Шӯрои хизматрасонии молиявии исломиро аз бар намуда буданд.
Дар семинари навбатӣ, Намояндаи Бонки Исломии Рушд, сармушовири Шуъбаи машваратӣ ва кӯмаки техникии Идораи рушди соҳаи молияи исломӣ Яҳё Алим Раҳмон оид ба мавзӯи “Муҳосибот барои маблағгузории исломӣ” барои иштирокчиён маълумоти муфассал пешниҳод хоҳад кард.
“Итминон дорам, ки машварат ва машғулиятҳои омӯзишӣ барои дар оянда дуруст ба роҳ мондани назорат ва танзими фаъолияти ташкилотҳои қарзӣ дар риштаи бонкдории исломӣ ба манфиати кор хоҳад буд”, - қайд намуд зимни сухани навбатӣ сармушовири Бонки Исломии Рушд Яҳё Алим Раҳмон.
Мавриди зикр аст, ки бонкдории исломӣ ягона низоми молиявиест, ки дар асоси қоидаву рукнҳо ва қонунҳои шариат новобаста ба таҳаввулоти сиёсиву иҷтимоӣ фаъолият мекунад. Хизматрасонии муштариён аз ҷониби бонкҳои исломӣ тибқи принсипҳои маблағгузории исломӣ амалӣ мегардад, ки асосан барои қонеъ гардонидани талаботи ҳаррӯзаи мардум новобаста аз дину оин равона шудааст.
Шуъбаи матбуоти БМТ