Конфронс дар мавзӯи “Автоматикунонии кори хазинадорон”

Рӯзҳои 2-3 августи соли 2018 дар Маркази таълимии Бонки миллии Тоҷикистон дар шаҳри Гулистон бо ташаббуси Бонки миллии Тоҷикистон ва ширкати байналмилалии “Томсон Рейтерс” конфронс дар мавзӯи “Автоматикунонии кори хазинадорон” бо иштироки роҳбарон, сардорони департаменти хазинадорӣ ва диллерҳои ташкилотҳои қарзӣ баргузор гардид.

Чорабинии мазкурро Муовини якуми Раиси Бонки миллии Тоҷикистон муҳтарам Нуралиев Ҷамолиддин Камолович ҳусни оғоз бахшида, қайд намуд, ки мақсади асосии пайваст шудани Бонки миллии Тоҷикистон ба Низоми электронии савдои “Томсон Рейтерс”, пеш аз ҳама рушди бозори байнибонкии асъор ва коғазҳои қиматнок, самаранок истифода бурдани фишангҳои сиёсати пулию қарзӣ ва асъорӣ, кам кардани хавфҳои амалиётӣ, таъмин намудани шаффофият ва автоматикунонии амалиётҳои мавҷудбуда, инчунин вусъат додани ҳамкорӣ баҳри ноил шудан ба ҳадафҳои гузошташуда мебошад.

Дар қисмати минбаъдаи ҳамоиш сардори Идораи амалиёт дар бозори озоди Бонки миллии Тоҷикистон Яқубов Мирҳаёт доир ба мавзӯи “Татбиқи амалиётҳои монетарӣ бо истифода аз низоми Томсон Рейтерс” муаррифӣ пешниҳод намуд.

Дар идомаи чорабинӣ намояндагони ширкати “Томсон Рейтерс” Максим Бурко, Ержан Сеибек ва Кирилл Бажанов бо рӯнамоҳо дар мавзӯъҳои “Фишангҳои нави автоматикунонии кори хазинадорон“, “ЕIKON. Маркази дастрас намудани манбаи амалиётҳои асъорӣ” ва “Автоматикунонии кори низоми дохилибонкӣ” баромад намуданд.

Дар рафти конфронс инчунин маърӯзаи мутахассиси шуъбаи назорати асъори Департаменти идораи захираҳои байналмилалӣ ва сиёсати қурби асъор Абдулқайси Саидҷаббор дар мавзӯи “Уҳдадориҳои агентҳои назорати асъор” шунида шуд.

Дар рафти муҳокимаронӣ иштирокдорони ҳамоиш ба саволҳои худ аз ҷониби маърӯзакунандагон посухҳои мушаххас гирифта, пешниҳодҳои манзуршуда мавриди баррасӣ қарор дода шуданд.

Кори конфронсро Муовини якуми Раиси Бонки миллии Тоҷикистон Ҷамолиддин Нуралиев ҷамъбаст намуда, ба намояндагони ширкати “Томсон Рейтерс” барои ташкили ин чорабинии муфид миннатдорӣ баён намуд. Ҷамолиддин Нуралиеваз ҷумла таъкид кард, ки ислоҳотҳои имрӯз дар низоми бонкӣ татбиқшаванда баҳри баланд бардоштани мақоми ташкилотҳои қарзӣ дар иқтисодиёт ва барқарор кардани эътимоди аҳолӣ ба низом равона карда шудааст. Аз ин лиҳоз, ҳамкории судманд бо низоми электронии “Томсон Рейтерс” аз соли 2015 инҷониб, имкон медиҳад, то ба сатҳе ба ин мақсади гузоштаи худ расем.

Дар баробари ин, Нуралиев Ҷамолиддин пешниҳод намуд, ки баҳри беҳтар муаррифӣ намудани низоми молиявии ҷумҳурӣ ва ҷалби сармоягузории хориҷӣ ба кишвар, бояд маълумотҳо роҷеъ ба Ҷумҳурии Тоҷикистон дар саҳифаи низоми электронии “ Томсон Рейтерс “такмил дода шуда, ҳамгироии низоми автоматишудаи бонкӣ бо низоми электронии “Томсон Рейтерс” ба роҳ монда шавад. Инчунин, баҳри таъмин намудани шаффофияти фаъолияти Бонки миллии Тоҷикистон дар низоми электронии “Томсон Рейтерс”саҳифаи алоҳидаи Бонки миллии Тоҷикистон ташкил карда шуда, аз ҷониби ширкати байналмилалии “Томсон Рейтерс” барои такмили ихтисоси хазинадорон ва диллерони ташкилотҳои қарзии Тоҷикистон курсҳои омӯзишӣ ташкил карда шаванд.

Сипас, намояндаи ширкати байналмилалии “Томсон Рейтерс” сардори шуъбаи рушди ҳамкорӣ дар давлатҳои ИДМ - Александр Аухариев барои дар сатҳи баланд ва хотирмон гузаштани чорабинии мазкур ба ҳозирин арзи сипос намуд.

Дар хотима, ташкилотҳои қарзие, ки дар низоми мазкур фаъолона иштирок менамоянд ва дар рушди технологияҳои молиявӣ дар бозори байнибонкӣ саҳми назаррас доранд, аз ҷониби ширкати “Томсон Рейтерс” бо мукофотҳои хотирмон қадрдонӣ карда шуданд.

Департаменти идораи захираҳои байналмилалӣ