Ислоҳоти қонунгузорӣ оид ба аҳдҳои таъминнок ва коркарди феҳристи гарав

Бонки миллии Тоҷикистон дар ҳамбастагӣ бо Корпоратсияи байналмилалии молиявӣ (IFC) 28 августи соли 2018 барои намояндагони ташкилотҳои қарзии кишвар дар мавзӯи “Ислоҳоти қонунгузорӣ оид ба аҳдҳои таъминнок ва коркарди феҳристи гарав” мизи мудаввар доир намуд.

Чорабиниро Муовини Раиси Бонки миллии Тоҷикистон Сироҷиддин Икромӣ ҳусни оғоз бахшида, оид ба татбиқи ислоҳот, ҳолати аҳдҳои таъминнок, алалхусус аз рӯи қарзҳои бо амволи манқул таъминшуда шарҳи мухтасар пешниҳод намуда, қайд кард, ки яке аз хусусиятҳои асосии низоми молиявии муътадил дастрасӣ ба маблағгузорӣ мебошад.

“Мушкилоти асосии дастрас кардани маблағи қарзӣ бо шартҳои барои ҳарду ҷониб мусоид, чӣ барои қарзгиранда ва чӣ барои қарздиҳанда дар кишварҳои рӯ ба тараққӣ феълан омили асосии ба таъхир афтодани рушди корхонаҳои хурду миёна мебошад. Омили мазкур дар навбати худ, ба афзоиши қарздиҳӣ ва фазои сармоягузорӣ таъсири манфӣ расонида, ба гароншавии хизматрасонии молиявӣ оварда мерасонад ва хавфҳои марбут ба додани қарзро зиёд мекунад”, - изҳор дошт зимни суханронӣ Сироҷиддин Икромӣ.

Дар идомаи чорабинӣ мутахассиси пешбари IFC Мурат Султанов дар мавзӯъҳои “Ислоҳоти қонунгузорӣ оид ба аҳдҳои таъминнок – ҷанбаҳои асосии ислоҳот” ва “Маблағгузорӣ таҳти гарави амволи манқул – маҳсулот ва имкониятҳо”, мутахассиси ҶДММ «Истера» Бобоев Мурод дар мавзӯи “Феҳристи гарав” ба иштирокдорон рӯнамои худро манзур намуданд.

Иштирокдорони мизи мудаввар рӯнамоҳои мазкурро мавриди баррасӣ ва муҳокима қарор дода, ба саволҳои худ дар мавзӯи “Вобаста ба ислоҳоти қонунгузорӣ оид ба аҳдҳои таъминнок ва коркарди феҳристи гарав” посухҳои мушаххас дарёфт намуданд.

Муовини Раиси БМТ Сироҷиддин Икромӣ дар ҷамъбасти мизи мудаввар иброз дошт, ки роҳандозии чунин чорабиниҳо муҳим ва саривақтӣ буда, дар кори амалии ҳаррӯза ва баланд бардоштани маҳоратии касбии кормандони низоми бонкии мамалакат аз манфиат холӣ нест.

Шуъбаи матбуоти БМТ