Мулоқоти Ҷамолиддин Нуралиев бо намояндаи Маркази рушди иқтисодии (СDE) Коллеҷи Вилиамси ИМА

21 сентябри соли 2018 Муовини якуми Раиси Бонки миллии Тоҷикистон Ҷамолиддин Нуралиев бо ёвари директори Маркази рушди иқтисодии (СDE) Коллеҷи Вилиамси ИМА хонум Рашел Луис (Rachel Louis) мулоқот анҷом дод.

Муовини якуми Раиси Бонки миллии Тоҷикистон Ҷамолиддин Нуралиев нахуст ташрифи хонум Рашел Луисро ба Бонки миллии Тоҷикистон хайрамақдам гуфта, аз ҳамкории Бонки миллии Тоҷикистон бо барномаҳои омӯзишии ИМА, бахусус дар бахши иқтисодиёт ёдовар шуд.

Ҷамолиддин Нуралиев инчунин, ҷиҳати роҳандозии ҳамкорӣ бо коллеҷи номбурда изҳори ҳавасмандӣ зоҳир намуда, барои равобити густурдаи Бонки миллии Тоҷикистон дар барномаи омӯзишӣ барои дарёфти унвони магистрии Маркази рушди иқтисодиёти Коллеҷи Вилиамси ИМА таклифҳои мушаххас пешниҳод намуд.

Зимни мулоқот ҷонибҳо масъалаҳои ҳамкории Бонки миллии Тоҷикистонро бо Коллеҷи Вилиамси ИМА муҳокима карда, иштироки довталабон аз зумраи кормандони БМТ-ро дар барномаи магистрии Маркази рушди иқтисоди коллеҷи мазкур мавриди баррасӣ қарор доданд.

Дар рафти мулоқот, ки дар он роҳбарони воҳидҳои сохтории Бонки миллии Тоҷикистон ширкат доштанд, ёвари директори Маркази рушди иқтисоди Коллеҷи Вилиамси ИМА хонум Рашел Луис ба ҳозирин оид ба риштаҳои омӯзиш дар барномаи магистрии коллеҷи мазкур рӯнамоии муфассал пешниҳод намуд. Дар рафти рӯнамоӣ самтҳои асосии барномаи магистрӣ, аз ҷумла бахшҳои назарияи молияи давлатӣ, эконометрика, моделкунонӣ,рушди молия ва назорат, сиёсати андозӣ дар бозори тараққиёбанда, буҳрони молиявӣ, сиёсати макроиқтисодии давлатҳои рӯ ба тараққӣ ва дар ҳолати гузариш қарордоштаро муаррифӣ намуд. Зикр гардид, ки барои таҳсил дар барномаи магистрии Маркази рушди иқтисоди (СDE) Коллеҷи Вилиамс довталабон аз давлатҳои иқтисодиёташон рӯ ба тараққӣ ва дар ҳолати гузариш қарордошта, ки дорои таҷрибаи назарраси корӣ дар сохторҳои давлатӣ мебошанд, ҷалб карда мешаванд. Муҳлати барномаи магистрии коллеҷи мазкур даҳ моҳ буда, барои таҳсили довталабони муваффақ идрорпулӣ (стипендия) муқаррар карда шудааст. Аз ин рӯ, хонум Рашел Луис ба ҳозирин маълумоти мушаххасро дар бораи талаботҳои асосӣ барои довталабон, тарзи пешниҳоди ҳуҷҷатҳо барои иштирок дар озмуни барномаи магистрӣ манзур намуд. Дар хотимаи муаррифӣ ҳозирин ба суолҳои худ посухи мушаххас гирифта, барои таҳсил дар барномаи магистрии коллеҷи мазкур изҳори ҳавасмандӣ намуданд.

Маврид ба зикр аст, ки чанд нафар аз собиқ кормандони Бонки миллии Тоҷикистон дар барномаи магистрии Маркази рушди иқтисодии Коллеҷи Вилиамс таҳсил доранд. Коллеҷи мазкур соли 1793 ташкил ёфта, яке аз коллеҷҳои бонуфузи ИМА ба ҳисоб меравад, ки дар он ҳамасола наздики 2 100 нафар донишҷӯён беш аз 110 давлати дунё ба таълим фаро гирифта мешаванд. Ҳайати устодони коллеҷи мазкур хатмкунандагони бонуфузтарин донишгоҳҳои ИМА буда, дар институтҳои байналмилалии молиявӣ, аз қабили Хазинаи байналмилалии асъор ва Бонки ҷаҳонӣ таҷрибаи корӣ андухтаанд. Хатмкунандагони барномаи магистрии ин коллеҷ дар рушди иқтисодиёти кишварҳои худ фаъолона ширкат меварзанд, аз ҷумла дар вазифаҳои пурмасъул ба ҳайси сарвазир, раиси бонкҳои марказӣ, сафиру вазир кору фаъолият доранд.

Ҳамасола барои сазовор шудани таҳсил дар барномаи магистрии Маркази рушди иқтисодии Коллеҷи Вилиамс садҳо довталабон дар озмуни қабул иштирок мекунанд. Дар барномаи магистрии Коллеҷи Вилиамс довталабон аз давлатҳои Осиё, Африка, Америкаи Шимолӣ ва Ҷанубӣ, давлатҳои собиқ сотсиалистӣ ва Шарқи наздик таҳсил менамоянд.

Шуъбаи матбуоти БМТ