Густариши ҳамкориҳои Бонки миллии Тоҷикистон бо Корпоратсияи байналмилалии молиявӣ

16 октябри соли 2018 Муовини якуми Раиси Бонки миллии Тоҷикистон Ҷамолиддин Нуралиев бо роҳбари Намояндагии минтақавии Корпоратсияи байналмилалии молиявӣ (IFC) дар Осиёи Марказӣ хонум Кассандра Колберт, ки ҷиҳати иштирок дар Форуми байналмилалии соҳибкории Душанбе - 2018 таҳти унвони «Рушди соҳибкориву сармоягузорӣ ва равандҳои муосири иқтисодӣ» дар шаҳри Душанбе қарор дорад, мулоқоти корӣ доир намуд.

Зимни мулоқоти Муовини якуми Раиси Бонки миллии Тоҷикистон Ҷамолиддин Нуралиев ва хонум Кассандра Колберт вазъи кунунии бахши молиявии мамлакат, дурнамои рушди соҳа дар давраи миёнамуҳлат ва дарозмуддат, имконияти ба роҳ мондани ҳамкориҳои дуҷониба дар бахши молиявӣ тавассути афзоиши сармоягузориҳо дар муассисаҳои молиявии кишвар мавриди муҳокима қарор дода шуд.

Муовини якуми Раиси БМТ Ҷамолиддин Нуралиев ҳамзамон диққати хонум Кассандра Колбертро ба ду самти муҳим, аз ҷумла маблағгузории низоми бонкӣ ва кушодани суратҳисобҳои муросилотии бонкҳои Тоҷикистон дар хориҷи кишвар ҷалб намуда, аз намояндаи IFC даъват ба амал овард, ки барои баланд бардоштани сатҳи маърифатнокии молиявии аҳолӣ ва рушди бахши суғурта ҳиссагузор бошанд.

Хонум Кассандра Колберт дар навбати худ қайд кард, ки барои ба роҳ мондани ҳамкории сифатан нав ва тавсеаи ҳамкории IFC бо Ҷумҳурии Тоҷикистон дар соҳаҳои гуногун, аз ҷумла бахши низоми бонкӣ талош хоҳад кард.

Маврид ба зикр аст, ки дар вохӯрии мазкур роҳбари идораи Корпоратсияи байналмилалии молиявӣ дар Ҷумҳурии Тоҷикистон Манижа Мамаднабиева ва роҳбарони воҳидҳои сохтории БМТ иштирок намуданд.

Шуъбаи матбуоти БМТ