Мулоқоти Ҷамолиддин Нуралиев бо ҷаноби Сандип Махаҷан

16 октябри соли 2018 дар Бонки миллии Тоҷикистон мулоқоти Муовини якуми Раиси Бонки миллии Тоҷикистон Ҷамолиддин Нуралиев бо Менеҷери бахши макроиқтисодӣ, тиҷорат ва сармоягузории Бонки Ҷаҳонӣ дар минтақаҳои Аврупо ва Осиёи Марказӣ ҷаноби Сандип Махаҷан баргузор гардид.

Муовини якуми Раиси Бонки миллии Тоҷикистон Ҷамолиддин Нуралиев дар оғози мулоқот ҷаноби Сандип Махаҷан - Менеҷери Бонки Ҷаҳониро бо вазъи нишондиҳандаҳои макроиқтисодӣ, низоми бонкӣ, амалигардонии як қатор ислоҳотҳо ҷиҳати татбиқи босамари сиёсати пулию қарзӣ бо истифода аз фишангҳои муосири монетарӣ (амалиётҳои кӯтоҳмуҳлати бозтамвил, аз қабили қарзҳои овернайт, интрадей, музоядаҳои қарзӣ) ва гузариши батадриҷ ба реҷаи ҳадафгирии таваррумӣ дар доираи татбиқи як қатор лоиҳаҳои кӯмакҳои техникӣ ба таври мухтасар шинос намуд.

Менеҷери Бонки Ҷаҳонӣ ҷаноби Сандип Махаҷан дар навбати худ оид ба вазъи иқтисодии кишвар ва саҳми низоми бонкӣ дар ин самт, ислоҳотҳои татбиқшаванда ва тадбирҳои пешгирӣ намудани хавфҳои эҳтимолӣ бо дарназардошти таъсири омилҳои беруна, аз ҷумла мавҷҳои такрории буҳрони иқтисодӣ пурсон шуда, барои таҳким бахшидани сиёсати пулию қарзӣ ва саҳми он дар устувории иқтисодии кишвар изҳори андеша намуд. Ҷаноби Сандип Махаҷан зимни баррасии масъалаи устувории иқтисодиёт ва низоми молиявӣ изҳор дошт, ки новобаста аз таъсири фишорҳои буҳронӣ татбиқи бомуваффақи ислоҳотҳои гузаронидашуда дар самти дастрасии рейтинги соҳибихтиёрии давлат, ҷалби сармоягузориҳои хориҷӣ ба иқтисодиёт, солимгардонии низоми бонкӣ ва нигоҳ доштани сатҳи таваррум дар доираи нишондиҳандаҳои муътадили якрақама дар Тоҷикистон худ натиҷаи хуб аст.

Зимни мулоқот ҷонибҳо оид ба як қатор масъалаҳо вобаста ба буҳрони иқтисодии ҷаҳонӣ ва оқибатҳои он дар иқтисодиёти кишварҳои рӯ ба тараққӣ, инчунин ислоҳоти иқтисодӣ дар кишвар, вазъ ва дурнамои ҳамкориҳои Ҷумҳурии Тоҷикистон бо Бонки Ҷаҳонӣ табодули назар намуданд. Ҷонибҳо оид ба вазъи низоми бонкӣ, қарзҳои беруна, сармоягузорӣ ба Ҷумҳурии Тоҷикистон, саҳми шарикони стратегӣ дар рушди иқтисодиёт ибрози назар намуданд.

Дар фароварди мулоқот, Муовини якуми Раиси Бонки миллии Тоҷикистон Ҷамолиддин Нуралиев бо мақсади тақвият бахшидани ҳамкориҳо изҳори умед кард, ки Бонки Ҷаҳонӣ дар ҳисоботҳои иқтисодии худ оид ба Тоҷикистон бо назари воқеъбинона ва ба таври шаффоф бо назардошти ислоҳотҳои татбиқшуда хулосабаброрӣ хоҳад кард.

Мулоқоти мазкур дар фазои ҳамдигарфаҳмӣ доир гардида, дар рафти он, инчунин вусъат додани ҳамкориҳои дуҷонибаи судманд дар самтҳои дигари низоми бонкӣ ва роҳҳои таҳким бахшидани шарикии минбаъда мавриди баррасӣ қарор гирифтанд.

Шуъбаи матбуот