Варзишгари тоҷик Шаҳриёр Даминов дар Чемпионати Осиё оид ба қаиқронӣ соҳиби медали тилло гардид

Шаҳриёр Даминов, соли таваллудаш 1997, аз синни 14 солагӣ бо ин намуди варзиш дар Варзишгоҳи Борбад (Бонки миллии Тоҷикистон) машғули тамрин буда, чор соли охир 2013-2018 Чемпиони мутлақи Ҷумҳурии Тоҷикистон оид ба қаиқронӣ мебошад.

Варзишгари ҷавони тоҷик Шаҳриёр Даминов дар Чемпионати Осиё оид ба қаиқронӣ ва каноэ, ки 20-25 октябри соли 2018 дар шаҳри Самарқанди Ҷумҳурии Ӯзбекистон баргузор гардид, дар масофаи 1000 метр соҳиби мақоми аввал ва сазовори медали тилло гардид. Дар ин масофа ҷои дуюмро намояндаи Ӯзбекистон ва зинаи сеюмро варзишгари Эрон ишғол намуданд.

Бояд қайд кард, ки Чемпионати Осиё миёни ҷавонони то 23-сола ва Ҷоми Осиё оид ба қаиқронӣ дар шаҳри Самарқанди Ҷумҳурии Ӯзбекистон бо иштироки варзишгарони 16 давлати Осиё 20-25 октябри соли 2018 баргузор гардид. Ҷумҳурии Тоҷикистонро дар ин мусобиқа 23 варзишгар муаррифӣ намуда, бо 7 медалҳои тилло ва нуқра ба ватан баргаштанд.

Дар соли 2018 ин сеюм ғалабаи варзишгари ҷавон ва маъруфи тоҷик Шаҳриёр Даминов мебошад. Шаҳриёр Даминов моҳи августи соли равон дар Бозиҳои XVIII тобистонаи осиёӣ дар шаҳри Ҷакартаи Индонезия дар мусобиқаи қаиқронӣ дар каноэи якнафарӣ ба масофаи 1000 метр миёни мардон соҳиби мақоми дуюм ва сазовори медали нуқра гардид. Бояд гуфт, ки Бозиҳои XVIII осиёӣ дар чор сол як маротиба баргузор гашта, мавқеи хеле баланд дорад. Барои иштироки Шаҳриёр Даминов дар бозиҳои осиёии Ҷакарта (Индонезия) Бонки миллии Тоҷикистон сарпарастиро ба уҳда дошт. Шаҳриёр Даминови 21 сола инчунин моҳи майи соли равон дар Ҷоми Ҷаҳон, ки дар шаҳри Шегедеи Венгрия баргузор гардид, дар байни 54 давлати дунё шомили даҳгонаи аввал гашт.

Айни замон қаиқрони ҷавон Шаҳриёр Даминов барои гирифтани роҳхат ба Бозиҳои тобистонаи олимпӣ “Токио – 2020” тамоми саъю кӯшиши худро равона намудааст. Барои соҳиби роҳхат шудан Шаҳриёр Даминов бояд дар Чемпионати ҷаҳон (Венгрия) мақоми аз 1 то 6, дар Чемпионати Осиё (Таиланд) ва ё Ҷоми ҷаҳон мақоми аввалро сазовор шавад. Варзишгари ҷавон, айни ҳол дар мавзеи қаиқронии Варзишгоҳи Борбад бо Устоди варзиши дараҷаи байналмилалӣ оид ба қаиқронӣ Нодир Сафаров пайваста тамрин менамояд. Бояд гуфт, ки Нодир Сафаров беш аз 10 шогирд – устодони варзиш ва ғолибони мусобиқаҳои сатҳи байналмилалиро дар ин мактбаи варзишӣ ба воя расонида, айни замон боз 20 ҷавонону наврасонро барои иштирок дар мусобиқаҳои ҷумҳуриявӣ ва байналмилалӣ дар мавзеи атрофи Варзишгоҳи Борбад машқи тамрин медиҳад.

Шуъбаи матбуоти БМТ