Терроризм ва ифротгароӣ - зуҳуроти номатлуб

4 декабри соли 2018 бо мақсади иҷрои дастуру ҳидоятҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон дар робита ба баланд бардоштани ҳисси ватандустӣ, ҳувияти миллӣ, арҷ гузоштан ба арзишҳои милливу фарҳангӣ ва масъулияти падару модар дар таълиму тарбияи фарзанд бо иштироки директори Маркази исломшиносӣ дар назди Президенти Ҷумҳурии Тоҷикистон Файзулло Баротзода дар Бонки миллии Тоҷикистон ҷаласаи корӣ баргузор гардид.

Сардори Идораи кормандони бонк Давлаҳмад Гадоев оид ба терроризм ва экстремизм, омилҳои ба гурӯҳҳои ифротгаро гаравидани ҷавонон ва пешгирии он, инчунин Қонуни Ҷумҳурии Тоҷикистон “Дар бораи масъулияти падару модар дар таълиму тарбияи фарзанд” маърӯза намуд.

“Тарбия ва ба камол расонидани насли ояндасоз дар ҳама давру замон аз ташкили дурусти оила ва ташаккули маърифати оиладорӣ сарчашма гирифтааст. Зеро оила чӣ аз нигоҳи қонун ва чӣ аз назари маърифати исломӣ воҳиди асосии иҷтимоӣ буда, ташкили оила ва тарбияи фарзандон аз бузургтарин масъулият дар ҷомеа маҳсуб меёбад. Агар оила мустаҳкаму пойдор ва аз ҷиҳати маънавию ахлоқӣ солим бошад, ҷамъият ҳам устувор мегардад.

Сабаби ба иттиҳодияҳои ғайриқонунии хатарнок ва ҳар гуна ҳизбу ҳаракатҳои номатлуб майл пайдо кардани ҷавонон, дур мондани онҳо аз муҳити оила ва аз бепарвоии волидон нисбати ояндаи фарзандон маншаъ мегирад. Шомил гардидани ҷавонон ба ҳизбу ҳаракатҳои номатлуб ба амнияти шахс ва сулҳу суботи ҷомеа хатари ҷиддӣ дорад. Вазъи имрӯзаи бамиёномада, аз мо тақозо мекунад, ки зиракии сиёсиро аз даст надода, барои ҳифзи сулҳу суботи ҷомеа ва оромиву осудагии кишвар корҳои мушаххасро анҷом диҳем ва ба тақдири фарзандон ва Ватани азизамон бепарво набошем. Нагузорем, ки сулҳу субот ва оромии ҷомеаи моро касе ва ё чизе халалдор созад”, - қайд кард Д.Гадоев.

Директори Маркази исломшиносӣ дар назди Президенти Ҷумҳурии Тоҷикистон Файзулло Баротзода зимни суханронӣ масъалаи мазкурро чунин шарҳ дод: “Имрӯз инсоният ба хатарҳои нави глобалӣ, аз қабили терроризм ва экстремизм рӯ ба рӯ гардидааст. Терроризм ва ифротгароӣ яке аз зуҳуроти номатлуб дар замони имрӯза ба шумор меравад, зеро зуҳуроти мазкур боиси ба миён омадани оқибатҳои нохуш - таҳдид ё истифодаи зӯроварӣ, расонидани зарари вазнин, таҷовуз ба ҳаёти арбоби давлатӣ ё ҷамъиятӣ, бенизомӣ, тағйири сохти конститутсионӣ дар мамлакат, ғасби ҳокимият ва аз они худ кардани ваколатҳои он, барангехтани низои миллӣ, иҷтимоӣ ва динӣ мебошад.

Мутаассифона ин зуҳуроти номатлуб дар минтақаҳои гуногуни ҷаҳон доман паҳн карда, хатари бузурги иҷтимоӣ дорад ва барои амнияти давлатҳои алоҳида ва минтақаҳо воқеан таҳдид эҷод менамояд.

Имрӯз дар як қатор давлатҳо ҷангҳои харобиовар идома дошта, боиси афзоиши шумораи фирориёни иҷборӣ, бекорӣ, гуруснагӣ ва шиддат гирифтани проблемаҳои дигари иҷтимоӣ гардидаанд. Терроризм ва ифротгароӣ беш аз ҳарвақта авҷ гирифта, бо оқибатҳои даҳшатбору бераҳмонаи худ ба проблемаи ҷиддитарини инсоният дар асри бисту як табдил ёфтааст. Ҷумҳурии Тоҷикистон ҳамчун як узви комилҳуқуқи ҷомеаи ҷаҳони мубориза бар зидди терроризм ва экстремизмро яке аз ҳадафҳои асосии худ қарор дода, дар ин самт чораҳи мушаххас андешида истодааст.

Мо аҳли ҷомеа бояд иқдомҳои Асосгузори сулҳу ваҳдати миллӣ – Пешвои миллат, муҳтарам Эмомалӣ Раҳмонро дар ин самт дастгирӣ намоем ва омилҳои пайдоиши терроризм ва экстремизмро пешгирӣ намуда, барои ҳифзи якпорчагии ин Ватани биҳиштосо ҳамеша омода бошем”, - таъкид намуд Файзулло Баротзода.

Дар қисмати ҷамъбастии вохурӣ иштирокдорон ба Директори Маркази исломшиносӣ дар назди Президенти Ҷумҳурии Тоҷикистон Файзулло Баротзода фикру мулоҳизаҳои худро дар ин бора пешниҳод намуда, ба саволҳояшон ҷавобҳои мушаххас гирифтанд.

Шуъбаи матбуоти БМТ