Дастгирии ташаббусҳои созанда ва саҳмгузорӣ дар ободу зебо гардонидани пойтахт

Дар такя ба ташаббусҳои доимӣ ва созандаи Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҷиҳати анҷом додани корҳои ободониву созандагӣ ва кабудизоркунии муҳити атроф бахшида ба сазовор истиқбол гирифтани 30-солагии Истиқлолияти давлатии Ҷумҳурии Тоҷикистон ва дар сатҳи баланд таҷлил намудани озмуни “Сайри гули лола” дар Бонки миллии Тоҷикистон низ, корҳои ободонӣ, тозаву озода намудани назди биноҳои маъмурӣ, кӯчаву хиёбонҳо, сабзу хуррамгардонии гулгаштҳо, шинонидани гулу дарахтони ороишиву ҳамешасабз бомаром идома дорад.

Хосатан, раванди бештари корҳо дар самти ниҳолшинонӣ, бо тарҳи мувофиқ ороиш додани дарахтони ҳамешасабз, нарму омода намудани замину гулгаштҳо ва шинонидани гулҳои гуногунранг дар назди биноҳои маъмурии Дастгоҳи марказӣ, Шуъбаҳои минтақавӣ ва Марказҳои таълимии Бонки миллии Тоҷикистон дар шаҳру ноҳияҳои ҷумҳурӣ ба анҷом расонида шудаанд. 

Маврид ба зикр аст, ки барои ободу зебо гардонидани назди биноҳои маъмурии БМТ дар хиёбони Рудакӣ, ки дар шафати хатсайри протоколӣ ҷойгиранд, зиёда аз 15 ҳазор дона гули лола ва 12 ҳазор бех гулҳои мавсимӣ шинонида шуда, насби кӯзаҳои декоративӣ бо гулҳои мавсимӣ (алпенария) амалӣ карда шудааст.

Айни замон гулҳои лола дар ҳолати хуби нашъунамо қарор дошта, гулгашти мазкур мавзеи мувофиқ барои истироҳат ва сайругашти сокинону меҳмонони пойтахти кишварамон гардидааст. Тадбири мазкур ҳамчунин дар шуъбаҳои минтақавӣ ва марказҳои таълимии Бонки миллии Тоҷикистон дар шаҳру ноҳияҳои Хоруғ, Бохтар, Кӯлоб, Хуҷанд, Гулистон ва Варзоб низ, амалӣ карда шудааст.

Қайд намудан зарур аст, ки бо мақсади саҳмгузорӣ барои боз ҳам ободу зебо гардонидани кӯчаву хиёбон ва боғу гулгаштҳои шаҳри Душанбе аз ҷониби Бонки миллии Тоҷикистон парвариши гулҳои гуногуни мавсимӣ ва қаламчаи гули садбарг дар замину гармхонаҳои Дастгоҳи марказӣ ва шуъбаҳои минтақавии Бонки миллии Тоҷикистон ба роҳ монда шуда, то ин муддат барои ободонии шаҳри Душанбе зиёда аз 45 ҳазор дона буттаҳои гули садбарг ва 75 ҳазор дона гулҳои гуногунранги мавсимӣ барои шинонидан дар гулгашту хиёбонҳои пойтахт саҳмгузорӣ карда шуд. 

Бонки миллии Тоҷикистон минбаъд, низ барои тозаву озода нигоҳ доштани муҳити атрофи биноҳои бонк ва шинонидани дарахту ниҳолҳои ороишӣ кӯшиш ба харҷ хоҳад дод.

Шуъбаи матбуоти БМТ