Таҷлили ҷашни Истиқлолияти давлатӣ дар Бонки миллии Тоҷикистон

05 сентябри соли 2019 дар Бонки миллии Тоҷикистон бахшида ба таҷлили ҷашни 28-умин солгарди Истиқлолияти давлатии Ҷумҳурии Тоҷикистон чорабинии тантанавӣ таҳти роҳбарии Раиси Бонки миллии Тоҷикистон Ҷамшед Нурмаҳмадзода, Муовини якуми Раиси Бонки миллии Тоҷикистон Ҷамолиддин Нуралиев, Муовинони Раис Салимова Лола, Ҳамидулло Машрабзода ва ҳайати кормандони Бонки миллии Тоҷикистон доир гардид.

Чорабинии тантанавӣ бо садо додани Суруди миллӣ аз ҷониби ҳайати кормандон ва ба толор ворид кардани Парчами давлатӣ оғоз ёфта, баъдан Раиси Бонки миллии Тоҷикистон Ҷамшед Нурмаҳмадзода бахшида ба ин ҷашни муҳими давлатӣ ва миллӣ суханронӣ намуд.

Зимни суханронӣ Ҷамшед Нурмаҳмадзода зикр кард, ки бо давлати мустақил эълон шудани Тоҷикистон дар таърихи 9-уми сентябри соли 1991 дар китоби таърихи миллати куҳанбунёди мо саҳифаи наве бо номи даврони Истиқлолият оғоз гардид ва халқи шарафманди мо соҳиби комилҳуқуқ ва воқеии ватани худ гашт.

Раиси Бонки миллии Тоҷикистон бо ёдоварӣ аз солҳои аввали Истиқлолият, таъкид намуд, ки бунёди давлати миллӣ марҳилаи бисёр душвор ва ҳассос аст. Аз нахустин рӯзҳои эълони Истиқлолият мушкилоти сиёсию иқтисодӣ ва иҷтимоию фарҳангӣ, ки хоси ҳамин марҳила мебошанд, дар Тоҷикистон низ пеш омада, домангири ҷомеаи мо гаштанд ва мамлакат ба гирдоби буҳрони сиёсию иқтисодӣ ва иҷтимоию маънавӣ кашида шуд.

- Ба бахти миллати тоҷик ва бо амри тақдир дар он айёми сарнавиштсоз масъулияти роҳбарии Тоҷикистони азиз ба дӯши фарзанди дилсӯзу ватанпарасти миллат, сиёсатмадори барҷаста Эмомалӣ Раҳмон вогузор гардид. Пешвои миллати мо бо такя ба бузургони гузаштаву имрӯзаи миллат, имону виҷдон ва донишу хиради мардуми шариф тавонист ба Тоҷикистон сулҳ оварад ва зиндагии орому осударо дар мамлакат таъмин намояд,-иброз дошт Ҷамшед Нурмаҳмадзода.

Ҳамчунин дар идомаи суханронӣ таъкид гардид, ки сулҳи байни тоҷикон, ки бо шарофати хиради азалии мардуми шарафманди мо ба вуқӯъ пайваст, на танҳо аҳамияти умумимиллӣ, балки ҳамчунин аҳамияти фаромиллӣ ва байналмилалӣ пайдо кард. Ин таҷриба, дар таърихи башарият падидаи беназир маҳсуб гардида, метавонад барои фурӯ нишондани оташи ҷанг ва низоъҳои дохилӣ дар дигар минтақаҳои даргири ҷаҳон мавриди истифода ва баҳрабардорӣ қарор дода шавад.

Зикр гардид, ки бо шарофати Истиқлолият ва раҳбариву раҳнамоии Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон имрӯз чор ҳадафи стратегии мамлакат – раҳоӣ аз бунбасти коммуникатсионӣ, таъмини амнияти озуқаворӣ, таъмини истиқлолияти энергетикӣ ва саноатикунонии босуръати кишвар зина ба зина амалӣ шуда истодаанд, ки ин имкон медиҳад, то Тоҷикистон дар ояндаи наздик ба кишвари содиркунандаи нерӯи барқи арзон ва аз ҷиҳати экологӣ бехатар ва қаламрави транзитӣ табдил ёфта, тадриҷан дар сохтори муносибатҳои иқтисоди ҷаҳонӣ мавқеи шоистаи худро пайдо намояд.

Яке аз воқеаҳои фараҳбахши даврони Истиқлолияти давлатӣ, ки Раиси Бонки миллии Тоҷикистон аз он ёдоварӣ намуд, ин ба истифода додани чархаи аввали Неругоҳи барқи обии Роғун буд. Дар ин маврид Ҷамшед Нурмаҳмадзода ташаббус ва заҳматҳои шабонарӯзии Пешвои муаззами миллатро махсус қайд карда, таъкид дошт, ки имсол дар рӯзи таҷлили ҷашни фархундаи Истиқлолият чархаи дуюми ин иншооти бузурги аср ба истифода дода мешавад, ки ин саҳифаи заррин дар китоби таърихи давлатдории нави мо буда, барои ободонии мамлакат ва таъмини истиқлолияти энергетикии он заминаи мусоид мегузорад.

- Саҳми барҷастаи Асосгузори сулҳу ваҳдати миллӣ – Пешвои миллат, Президенти мо муҳтарам Эмомалӣ Раҳмон на танҳо дар бунёди давлати миллӣ, балки дар таҳкими пояҳои ҷомеаи имрӯз, аз ҷумла ташкил ва рушди низоми бонкии мамлакат арзанда мебошад. Имрӯз низоми бонкии мамлакат ҳамқадами Истиқлолият пеш меравад ва ба дастовардҳои назаррас ноил мегардад. Вазифаи ҷонии ҳар кадоми мо гузоштани саҳми назаррас дар пешрафти низоми бонкии мамлакат ба ҳисоб меравад, -таъкид намуд Раиси Бонки миллии Тоҷикистон.

Дар поёни суханронии худ Ҷамшед Нурмаҳмадзода бори дигар ҳозиринро бо фаро расидани ҷашни хуҷастаи 28-умин солгарди Истиқлолияти давлатии Ҷумҳурии Тоҷикистон табрик намуда, бо як сухани Пешвои миллат нутқи худро хотима бахшид: “Мо ҳамеша бояд шукронаи ин миллату давлат ва Истиқлолияти он намоем. Халқу Ватани азизамонро ба ҷон дӯст дорем ва барои ободию шукуфоии он содиқонаву самимона заҳмат кашем”.

Дар идомаи чорабинӣ кормандони сермаҳсул ва фаъоли БМТ аз ҷониби роҳбарияти бонк қадрдонӣ гардиданд. Аз ҷумла, муовини директори Департаменти ҳисобдорӣ – муовини сармуҳосиб Ҷобирова Санавбар ва муовини мудири Шуъбаи минтақавии Бонки миллии Тоҷикистон дар шаҳри Хуҷанд Сираева Зебо бо нишони сарисинагии “Аълочии Бонки миллии Тоҷикистон” сарфароз гардонида шуданд. Инчунин, ба кормандоне, ки фаъолона меҳнат карда, нишондиҳандаҳои баландро соҳиб гардидаанд, Ифтихорномаи Бонки миллии Тоҷикистон дар фазои тантанавӣ тақдим карда шуд.

Шуъбаи матбуоти БМТ