Ифтитоҳи раванди таҳияи Стратегияи миллии фарогирии молиявӣ

1 октябри соли 2019 дар шаҳри Душанбе ба раванди таҳияи “Стратегияи миллии фарогирии молиявӣ дар Ҷумҳурии Тоҷикистон” дар доираи чорабинии тантанавӣ ифтитоҳ бахшида шуд. Дар расми ифтитоҳи чорабинии мазкур намояндагони Бонки миллии Тоҷикистон ва Гурӯҳи бонки ҷаҳонӣ/Корпоратсияи байналмилалии молиявӣ ба ҳайси шарики асосӣ дар таҳияи Стратегияи миллии фарогирии молиявӣ ва вазорату идораҳои дахлдори кишвар ширкат варзиданд.

Чорабиниро Муовини Раиси Бонки миллии Тоҷикистон Лола Салимова ҳусни оғоз бахшида, изҳор дошт, ки дар шароити муносибатҳои муосири хоҷагидорӣ натиҷаҳои фаъолияти низоми бонкӣ ва молиявии кишвар тавассути фаро гирифтани аҳолӣ ба хизматрасониҳои гуногуни молиявию бонкӣ баҳодиҳӣ мешаванд. Аз ин рӯ, Бонки миллии Тоҷикистон бо мақсади дастрасию истифодаи хизматрасониҳои баландсифати бонкӣ баҳри рушди соҳибкории хурду миёна, зиёд гардидани миқдори суратҳисобҳо дар ташкилотҳои қарзӣ, ҳисоббаробаркуниҳои ғайринақдӣ тавассути низомҳои пардохтии электронӣ, интиқоли маблағҳои пулӣ, ҷалби пасандозҳои аҳолӣ, пешниҳоди қарзҳои дастрас, рушди бозори суғуртавӣ ва баланд бардоштани саводнокии молиявии аҳолӣ зарурати таҳияи “Стратегияи миллии фарогирии молиявӣ дар Ҷумҳурии Тоҷикистон”-ро муҳим ва саривақтӣ мешуморад.

Дар ин самт Бонки миллии Тоҷикистон дар ҳамкорӣ бо шарикони рушд Гурӯҳи кории дохилиидоравӣ барои таҳияи Стратегия таъсис додааст ва дар самти расонидани кӯмакҳои техникӣ ва ҷалби коршиносони байналмилалӣ, Созишнома бо Корпоратсияи байналмилаии молиявӣ дар доираи лоиҳаи “CAFINC” ба имзо расонида шуд, ки қадамҳои минбаъдаро барои таҳияи Стартегияи миллии фарогирии молиявӣ муайян менамояд.

Муовини директори Котиботи Швейтсария оид ба масоили иқтисодӣ (SECO) хонум Коринн Деменҷ ва Намояндаи доимии Бонки ҷаҳонӣ дар Тоҷикистон ҷаноби Ян Петер Олтерс дар навбати худ қайд карданд, ки таҳияи “Стратегияи миллии фарогирии молиявӣ дар Ҷумҳурии Тоҷикистон” саривақтӣ буда, метавонад ба рушди минбаъдаи иқтисодиёти кишвар саҳми арзанда гузорад.

Дар идомаи нишаст, мутахассиси калон оид ба соҳаи молияи Бонки ҷаҳонӣ хонум Маргарет Миллер зимни рӯнамоии худ дар бораи “Стратегияи миллӣ оид ба дастрасии молиявӣ: таҷрибаи ҷаҳонӣ ва беҳтарин амалияҳо барои Тоҷикистон”, директори Пажӯҳишгоҳи илмӣ-тадқиқотии Бонки миллии Тоҷикистон Моҳбону Накатова дар мавзӯи “Вазъи дастрасии молиявӣ дар Тоҷикистон” ва мушовири калон оид ба соҳаи молияи Корпоратсияи байналмилалии молиявӣ Олга Томилова дар робита ба “Стратегияи миллии фарогирии молиявӣ дар Ҷумҳурии Тоҷикистон барои Тоҷикистон: қадамҳои пешниҳодшаванда, раванд ва муҳлатҳо” дар назди ҳозирин баромад намуда, оид ба вазъи дастрасии молиявии кунунӣ дар Тоҷикистон ва корҳои дар ин самт анҷомдодашуда, ташкили раванди таҳия ва муҳлати пешниҳоди он маълумоти мухтасар пешниҳод намуданд.

Аъзоёни Гурӯҳи кории “Стратегияи миллии фарогирии молиявӣ дар Ҷумҳурии Тоҷикистон” дар қисмати амалии кори нишаст оид ба самти техникӣ, аз ҷумла таҳияи лоиҳа, муайянсозии ҳадафҳо, замина, ҳамоҳангсозии кори Гурӯҳи корӣ, муҳлатҳои пешкаши маводҳо ва роҳҳои таҳвили нуқтаҳои дастрасӣ фикру андешаҳои худро баён намуданд.

Дар рӯзи дуюми баргузории чорабинии мазкур аз ҷониби иштирокчиён мавзӯъҳои калидӣ, аз ҷумла саводнокии молиявӣ, ҳимояи ҳуқуқи истеъмолкунандагон ва васеъ гардонидани маҷмӯи маҳсулот, аз ҷумла, дастрасии соҳибкории хурду миёна ба маблағгузорӣ мавриди муҳокима қарор дода шуд.

Дар фароварди чорабинии ифтитоҳӣ Муовини Раиси Бонки миллии Тоҷикистон Салимова Л. изҳор намуд, ки бо мақсади татбиқи амалии дастуру супоришҳо аз Паёми Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олии Ҷумҳурии Тоҷикистон аз 26 декабри соли 2018 ҷиҳати баланд бардоштани сатҳу сифати хизматрасонии бонкӣ ва пешниҳоди қарзҳои дастрасу босифат, баланд бардоштани савияи касбии кормандони низоми бонкӣ ва мусоидат ба рушди иқтисодиёти рақамӣ Бонки миллии Тоҷикистон омода аст, бо ҳама вазорату идораҳо, ташкилотҳои байналмилалии молиявӣ ва тарафҳои манфиатдор ҷиҳати таҳия ва коркарди “Стратегияи миллии фарогирии молиявӣ дар Ҷумҳурии Тоҷикистон” ҳамкории зичу судмандро ба роҳ монад. “Умед аст, бо равнақу инкишофи фарогирии молиявии аҳолӣ ба хизматрасониҳои босифати бонкӣ рушди минбаъдаи иқтисодиёти кишвар ва сатҳи некуаҳволии мардум то андозае таъмин хоҳад шуд”,- гуфт дар фароварди суханронӣ Салимова Л.

Шуъбаи матбуот