Навовариҳои таъмини амнияти иттилоот дар давраи табдилёбии рақамӣ

28 ноябри соли 2019 бо ибтикори Бонки миллии Тоҷикистон дар ҳамкорӣ бо ширкати “Софтлайн” Конференсия таҳти унвони “Навовариҳои таъмини амнияти иттилоот дар давраи табдилёбии рақамӣ” дар шаҳри Душанбе доир гардид. Дар чорабинии мазкур Роҳбарияти Бонки миллии Тоҷикистон, намояндаи Дастгоҳи иҷроияи Президенти Ҷумҳурии Тоҷикистон, роҳбарияти ширкати “Софтлайн”, намояндаи Саридораи ҳифзи сирри давлатии назди Ҳукумати Ҷумҳурии Тоҷикистон ва сохторҳои давлативу ширкатҳои хусусии дохиливу хориҷӣ иштирок доштанд.

Мақсад аз баргузории чорабинии мазкурро масъулон дар вусъат бахшидани иқтидорҳои амнияти иттилоотӣ аз таҳдидҳои киберӣ маънидод карданд. Дар оғози конференсияи мазкур муовини Раиси Бонки миллии Тоҷикистон Ҳамидулло Машрабзода сухан карда оид ба навгониҳои технологияи иттилоотӣ, усулҳои таъмини амнияти иттилоотӣ ва муҳиммияти он ҳарф зад: “Бо мақсади татбиқи қарорҳои Ҳукумати ҶТ пардохтҳои ғайринақдӣ рӯз аз рӯз афзуда, шумораи хизматрасониҳои бонкӣ бо истифода аз пулҳои электронӣ, кортҳои бонкӣ ва дигар воситаҳои технологии пардохтҳои электронӣ ба таври васеъ амалӣ карда мешаванд. Имрӯзҳо, дар марҳилаи табдилёбии рақамӣ, ташкилотҳои қарзӣ аз хизматрасонии анъанавии бонкӣ ба хизматрасонии бонкии фосилавӣ ва зеҳнӣ гузашта истодаанд. Табдилёбии рақамӣ сифат ва суръати ҳамкориро бо муштариёни хизматрасониҳои бонкӣ ва ташкилотҳои қарзӣ беҳтар намуда, аммо дар дар баробари ин хавфҳои иловагиро ба миён меорад. Аз ин рӯ, таваҷҷуҳи бештар ва таъмини амнияти иттилоотӣ дар ташкилотҳои қарзӣ ҳамеша талаботи ҳатмӣ боқӣ хоҳад монд. Барои ҳар як ташкилот мушаххасот ва хусусияти низоми таъмини амнияти иттилоотӣ ба таври инфиродӣ ба кор бурда мешавад, бинобар ин пешниҳоди маҷмуии низоми муҳофизатӣ талаботи зарурии фаъолияти тамоми низоми бонкӣ маҳсуб меёбад”.

Дар ин замина, андешидани тамоми тадбирҳо баҳри амнияти иттилоотӣ ва ҳифз доштани махфияти маълумотҳои мизоҷон хеле муҳим мебошад. Бояд гуфт, ки низоми бонкӣ бо назардошти хусусияти маълумотҳое, ки дар онҳо маҳфуз дошта мешаванд, таҳти хавфи бештар қарор дорад. Ин маънои онро дорад, ки ташкилотҳои қарзӣ бояд ба рушди инфрасохтори худ ҷиҳати баланд бардоштани амнияти иттилоотӣ диққати бештар дода, дар ин самт тамоми тадбирҳои заруриро баҳри ҳифзи пойгоҳҳои маълумотҳои худ андешанд, изҳор дошт Ҳ.Машрабзода

Дар чорабинӣ, ҳамзамон мутахассисони Бонки миллии Тоҷикистон оид ба имкониятҳои мавҷуда ва таъмини амнияти иттилоотӣ дар низоми бонкии кишвар сухан карда изҳор доштанд, ки баҳри таъмини амнияти иттилоотӣ ва сазовор будан ба боварии мизоҷон тамоми чораҳои мавҷударо меандешанд.

Инчунин намояндагони ширкати “Софтлайн” зимни баромадҳои худ изҳор доштанд, ки ширкати мазкур дар тули 25 сол бо 50 давлати дунё ва 95 шаҳр ҳамкории зичро ба роҳ монда, дар самти таъмини амнияти иттилоотӣ, дастгирии техникӣ, омӯзиши мутахассисони соҳавӣ, рушди кансепсия ва амсоли он ба муштариён хизмат мерасонад.

Маврид ба зикр аст, ки ҷамъомадагон атрофи муҳофизати маҷмӯӣ аз кибертаҳдидҳои мураккаб, ки ба технологияҳои муттаҳидсозии инфрасохтори киберҷинояткорон асос ёфтааст, таъмини муҳити бехатар барои муассисаҳои молиявӣ, таъмини бехатарии табдилёбии тиҷорати рақамӣ сухан намуда, оид ба мушкилоти мавҷуда ва рушди бештари таъмини амнияти иттилоотӣ табодули афкор карданд.

Шуъбаи матбуот