Таъмини пардохтпазирӣ кафолати рушди низоми бонкӣ

24 сентябри соли 2020 дар Бонки миллии Тоҷикистон бо иштироки Роҳбарияти Бонки миллии Тоҷикистон ва роҳбарони ташкилотҳои қарзии молиявӣ ҷаласа доир гардид. Ҷамъомадро Раиси Бонки миллии Тоҷикистон Ҷамшед Нурмаҳмадзода ҳусни оғоз бахшида, барои фаъолияти пурсамар дар давраи хурӯҷи пандемияи COVID-19 ва мувофиқи имкон дастгирӣ намудани мизоҷон ба ташкилотҳои қарзии молиявӣ миннатдории хешро изҳор намуд.

Ҷамшед Нурмаҳмадзода дар идома оид ба вазъи низоми бонкии мамлакат суханронӣ намуда, ба масъулини ташкилотҳои қарзии молиявӣ барои азхудкунии маблағҳои ҷудокардашуда ва истифодаи маблағҳои озод барои додани қарз, паст кардани меъёри фоизии қарзҳо ва пешниҳоди қарзҳои дастрас, аз ҷумла баҳри дастгирии бахши истеҳсоли ватанӣ ва ба ин васила саҳм гузоштан дар рушди иқтисодиёт, ҷалби пасандозҳо, баланд бардоштани сатҳу сифати хизматрасониҳои бонкӣ, коҳиш додани ҳаҷми қарзҳои ғайрифаъол, васеъ кардани шабакаи хизматрасониҳои бонкӣ, бознигарӣ кардани таррофаҳои бонкҳо барои мизоҷон, саривақт пур кардани банкоматҳо бо пули нақд, таъмини шаффофият дар фаъолият ва пешгирии ҳолатҳои коррупсионӣ дар ташкилотҳои қарзии молиявӣ дастуру супоришҳои мушаххас дод. Раиси Бонки миллии Тоҷикистон зикр кард, ки дар сохтори идоракунӣ риояи муқаррароти нави қонунгузории бонкӣ дар мавриди фаъолияти якҷояи хешовандон дар як ташкилот таъмин карда шуда, тадбирҳои зарурӣ ҷиҳати ҷалби сармояи хориҷӣ ва дохилӣ ба низом, пешниҳоди саривақтии пардохтҳо ба корхонаву муассисаҳои бо воридоти маҳсулоти озуқаворӣ машғул, самарабахш истифода бурдани қарзҳои байнибонкӣ ва кам кардани маржаи фоизии он роҳандозӣ карда шавад.

Дар баробари ин Ҷамшед Нурмаҳмадзода аз роҳбарони ташкилотҳои қарзии молиявӣ даъват ба амал овард, ки барои бо натиҷаҳои назаррас ҷамъбаст намудани фаъолияти нуҳмоҳаи низоми бонкии мамлакат ва баҳри дар сатҳи баланди сиёсӣ ва ташкилӣ пешвоз гирифтани ҷашни 30 солагии Истиқлолияти давлатии Ҷумҳурии Тоҷикистон саҳми арзандаи худро гузоранд.

Дар идомаи ҷаласа Муовини Раиси Бонки миллии Тоҷикистон Ҳоким Холиқзода дар мавриди сиёсати қарзии ташкилотҳои қарзии молиявӣ ва таҳлилу ҷамъбасти онҳо бо назардошти таъсири пандемияи COVID-19, ҷой доштани масъалаҳои ҳалталаб дар фаъолияти кормандони масъули ташкилотҳои қарзӣ, пешгирии хавфҳои қарзӣ ва кам кардани таъсири онҳо ба вазъи молиявии ташкилотҳои қарзӣ, васеъ кардани қарздиҳии хурд ва миёна таҳлилҳои ҷолибро манзури ҳозирин гардонид. Ҳоким Холиқзода аз ҷумла қайд намуд, ки ташкилотҳои қарзии молиявӣ бояд фаъолияти худро дар самти тавсеа бахшидани қарздиҳӣ, ки яке аз вазифаҳои асосии низоми бонкӣ маҳсуб меёбад, таҷдиди назар карда, маданияти қарздиҳиро бо назардошти пешбинии хавфҳои ба он марбут ва риояи санадҳои меъёрии ҳуқуқӣ дар сатҳи зарурӣ ба роҳ монанд.

“Ба таври ҷиддӣ риоя гардидани талаботи санадҳои меъёрии ҳуқуқии танзимкунанда ва дастурҳои Бонки миллии Тоҷикистон аз ҷониби ташкилотҳои қарзии молиявӣ, диққати ҷиддӣ додан ба чораҷӯиҳо ва коҳиш додани қарзҳои ғайрифаъол, беҳтар кардани идоракунии корпоративӣ, пурзӯр кардани низоми назорати дохилӣ, баланд бардоштани тахассусияти кормандон, кам кардани истифодаи омилҳои инсонӣ зимни амалиётҳо боиси беҳтар гардидани иқтидори идора ва пардохтпазирии ташкилот аст. Аз ин рӯ, риояи талаботҳои мазкур барои ҳар як ташкилот ҳатмӣ ва зарур дониста мешавад”, - қайд кард Ҳ.Холиқзода.

Дар қисмати муҳокимаронӣ намояндагони ташкилотҳои қарзии молиявӣ бо пешниҳодҳо баромад намуда, ба муроҷиату саволҳои худ оид ба масъалаҳои ҳалталаби низоми бонкӣ аз ҷониби Роҳбарияти Бонки миллии Тоҷикистон посухҳои мушаххас гирифтанд.

Дар интиҳои ҷаласа Муовини Раиси Бонки миллии Тоҷикистон Ҳоким Холиқзода зикр дошт, ки барои беҳтар намудани сифати сандуқи қарзӣ, пешгирӣ намудани талафоти имконпазир аз рӯи қарзҳо, саривақт баргардонидани қарзҳои додашуда ва таъмини пардохтпазирӣ ташкилотҳои қарзии молиявӣ чораҳои саривақтӣ андешанд. Ташкилотҳои қарзии молиявиро зарур аст, ки барои мақсаднок истифода бурдани қарзҳои додашуда корҳои фаҳмондадиҳиро роҳандозӣ намуда, баҳри таъмини қарзҳо ва ҷалби пасандозҳо тадбирҳои зарурӣ андешанд.

Шуъбаи матбуот