Ҷаласаи навбатии Гурӯҳи корӣ оид ба Баҳодиҳии хавфи миллии қонунигардонии даромадҳои бо роҳи ҷиноят бадастоварда ва маблағгузории терроризм дар ҶТ

14 октябри соли 2020 дар бинои Бонки миллии Тоҷикистон ҷаласаи Гурӯҳи корӣ оид ба Баҳодиҳии хавфи миллии қонунгардонии даромадҳои бо роҳи ҷиноят бадастоварда ва маблағгузории терроризм дар Ҷумҳурии Тоҷикистон (минбаъд БХМ ҚД/МТ) доир гардид. Дар чорабинии мазкур Мушовири бахши Ёрдамчии Президенти Ҷумҳурии Тоҷикистон оид ба масъалаҳои ҳуқуқӣ, Роҳбари Гурӯҳи корӣ оид ба БХМ ҚД/МТ-Сироҷзода Сайфиддин ва намояндагони мақомоти назоратӣ, мақомоти ҳифзи ҳуқуқ ва мақоми ваколатдор дар самти МҚД/МТ/МПСҚО оид ба БХМ ҚД/МТ (аъзоёни Гурӯҳи корӣ) ширкат намуданд.

Ҷаласаро бо сухани ифтитоҳӣ Сироҷзода Сайфиддин оғоз намуда, изҳор дошт, ки мақсад аз баргузории ҷаласаи мазкур, ин муҳокимаи фаъолияти анҷомдодашуда ва андешидани чораҳо ҷиҳати бартараф кардани осебпазириҳо дар доираи Ҳисоботи БХМ ҚД/МТ ва кор дар самти хавфҳои қонунигардонии даромадҳои бо роҳи ҷиноят бадастоварда ва маблағгузории терроризм мебошад.

Дар идомаи ҷаласа аз ҷониби Директори Департаменти мониторинги молиявии назди Бонки миллии Тоҷикистон Билолов Фарҳод оид ба натиҷаи Ҳисоботи БХМ ҚД/МТ маълумот манзури ҳозирин гардид.

Масъалаҳои баррасигардидаи рӯнамоӣ аз ҷониби аҳли нишаст мавриди баррасӣ қарор дода шуда, барои беҳтар намудани фаъолият дар ин самт таклифу пешниҳодҳои судманд ироа гардид. Ҳамзамон, оид ба гузаронидани баҳодиҳии соҳавии хавфҳои қонунигардонии даромадҳои бо роҳи ҷиноят бадастоварда ва маблағгузории терроризм маълумоти махтасар пешниҳод гардид. Гуфта шуд, ки дар доираи гуфтушунидҳо бо намояндагони Хазинаи Байналмилалии асъор масъалаи Гузаронидани баҳодиҳии соҳавии хавфҳои ҚД/МТ барои ташкилотҳои зертобеъи Бонки миллии Тоҷикистон дар самти МҚД/МТ/МПСҚО ҳалли худро ёфта, дар баробари ин, аз ҷониби намояндагони Хазинаи Байналмилалии асъор тартиби гузаронидани баҳодиҳии соҳавии хавфҳои ҚД/МТ-и ташкилотҳои ҳисоботдиҳандаи Бонки миллии Тоҷикистон дар самти МҚД/МТ/МПСҚО, низ пешниҳод гардидааст.

Дар робита ба масъалаҳои гузошташуда дар рӯзномаи ҷаласа, намояндагони Гурӯҳи корӣ оид ба Баҳодиҳии хавфи миллии қонунгардонии даромадҳои бо роҳи ҷиноят бадастоварда ва маблағгузории терроризм дар ҶТ мубодилаи афкор намуда, барои татбиқи босамари он пешниҳодҳои мушаххас ироа карданд.

Дар хотима Роҳбари Гурӯҳи корӣ оид ба БХМ ҚД/МТ Сироҷзода Сайфиддин ба аъзоёни Гурӯҳи корӣ дастур дод, ки ҷиҳати пайгирии масъалаҳои баррасишуда дар доираи ҷаласаи мазкур чораҳои зарурӣ андешида, аз натиҷаи он то ҷаласаи оянда ба Департаменти мониторинги молиявии назди Бонки миллии Тоҷикистон ахборот пешниҳод намоянд.

Шуъбаи матбуот