Бонки миллии Тоҷикистон - ғолиби “Ҷоми Эсхата”

Дастаи футболи хурди Бонки миллии Тоҷикистон дар мусобиқае, ки 21 – 25 июн дар шаҳри Гулистони вилояти Суғд баргузор шуд, ғолиб омада, соҳиби мақоми аввал ва “Ҷоми Эсхата” гардид.

Мусобиқаи “Ҷоми Эсхата” бахшида ба таҷлили 30 - солагии истиқлолияти давлатии Ҷумҳурии Тоҷикистон байни дастаҳои футболи хурди бонкҳои кишвар гузаронида шуда, дар он ҳашт даста, аз ҷумла дастаи Бонки миллии Тоҷикистон, БДА ҶТ “Амонатбонк”, ҶСК “Бонки Эсхата”, ҶСК “Ориёнбонк”, ҶСП Бонки “Арванд”, ҶСК “Тавҳидбонк”, Шуъбаи минтақавии БМТ дар шаҳри Хуҷанд ва филиали ҶСП Бонки “Арванд” дар шаҳри Душанбе иштирок намуданд.

Дар даври ниҳоии мусобиқаи мазкур дастаи футболбозони Бонки миллии Тоҷикистон дастаи ҶСК “Бонки Эсхата”-ро бо ҳисоби 6:3 мағлуб намуда, барандаи ҷойи аввал ва сазовори Ҷоми мусобиқа гашт. ҶСК “Бонки Эсхата” бошад, мақоми ифтихории дуюмро касб намуд.

Қайд кардан ба маврид аст, ки қувваозмоӣ барои дарёфти ҷойи сеюм миёни дастаҳои футболи БДА ҶТ “Амонатбонк” ва Шуъбаи минтақавии БМТ дар шаҳри Хуҷанд низ хеле шавқовар гузашта, дастаи футболи БДА ҶТ “Амонатбонк” баъди пирӯзӣ бо ҳисоби 5:1 сазовори ҷойи сеюми мусобиқа гардид.

Ҳамин тавр, унвони “Мураббии беҳтарин” ба Наврӯз Қурбонов, “Дарвозабони беҳтарин” ба Фаридун Мирзоев ва “Бозингари беҳтарин” ба Мансур Эргашев, ки ҳар се аъзои тими Бонки миллии Тоҷикистон мебошанд, тақдим карда шуд.

Дар маросими ҷамъбастии мусобиқаи варзишӣ сардори шуъбаи футзали Федератсияи футболи Тоҷикистон Фурқат Ахмедҷонов, мудири Шуъбаи минтақавии БМТ дар шаҳри Хуҷанд Наврӯз Валиев ва роҳбарияти бонкҳои иштирокчӣ суханронӣ намуда, баргузории чунин мусобиқаҳоро дар рушд ва оммавигардонии соҳаи варзиш, таҳкими муносибати дӯстӣ байни кормандони низоми бонкии кишвар муҳим арзёбӣ намуданд. Изҳори боварӣ карда шуд, ки мусобиқаи “Ҷоми Эсхата” солҳои минбаъда низ баргузор гардида, барои иштирок дар он дастаҳои бештар ҷалб карда мешаванд.

Шуъбаи матбуот