Мулоқоти муовини Раиси БМТ Толибзода Фирдавс бо ҳайати Бонки Осиёгии рушд

18 октябри соли 2021 муовини раиси Бонки миллии Тоҷикистон Толибзода Фирдавс Назримад бо ҳайати коршиносони Бонки Осиёгии Рушд (БОР) мулоқоти фосилавӣ анҷом дод.

Нахуст муовини раиси Бонки миллии Тоҷикистон Толибзода Фирдавс ба ҳайати БОР барои дастгирӣ ҷиҳати пешниҳоди кӯмаки техникӣ дар доираи барномаи Такмили бахши молиявӣ ва идоракунии фискалӣ арзи сипос намуд. Мавсуф зикр кард, ки кӯмаки техникии мазкур бахшҳои назорати бонкӣ, рушди бозори суғурта, ҳимояи ҳуқуқи истеъмолкунандагони хизматрасониҳои молиявӣ, танзим ва назорати бонкдории исломиро фарогир буда, барои татбиқи муваффақонаи чораҳои индикативии барнома мусоидат хоҳад кард.

Дар идома, аз ҷониби ҳайати БОР мутахассис оид ба идоракунии давлатӣ Юҷи Мияки аз сатҳи ҳамкориҳои судманди ҷонибҳо изҳори қаноатмандӣ намуда, бо таваҷҷуҳ ба ислоҳоти татбиқшуда дар низоми бонкии Тоҷикистон қайд намуд, ки БОР афзалиятҳои рушди Ҷумҳурии Тоҷикистонро ҳамаҷониба дастгирӣ менамояд.

Дар робита ба ин, бо назардошти дархости Бонки миллии Тоҷикистон БОР чаҳор нафар мушовирони сатҳи байналмилалиро ҷалб намуд, ки зимни мулоқоти фосилавӣ аз ҷониби намояндаи БОР Юҷи Мияки муаррифӣ карда шуданд. Мушовирони байналмилалӣ, аз ҷумла мутахассиси бахши назорати бонкӣ Отар Надарая, мутахассиси бахши назорати суғуртавӣ Родолфо Верхан, мутахассиси бахши ҳимояи ҳуқуқҳои истеъмолкунандагони хизматрасониҳои молиявӣ Артур Димас ва мутахассиси бахши молиявии исломӣ Аида Осман зимни муаррифӣ омодагии хешро барои ҳамкорӣ бо масъулини Бонки миллии Тоҷикистон иброз доштанд.

Муовини Раиси БМТ Толибзода Фирдавс ва намояндаи БОР Юҷи Мияки зимнан изҳори умед карданд, ки машваратчиёни дорои таҷрибаи байналмилалӣ дар ҳамкорӣ бо мутахассисони Бонки миллии Тоҷикистон дар татбиқи лоиҳаҳои муштарак ва роҳандозӣ намудани ислоҳотҳои минбаъда муваффақ шуда, ба ин васила дар рушди низоми бонкии Ҷумҳурии Тоҷикистон саҳми арзанда мегузоранд.

Дар ҷараёни вохӯрӣ ҷонибҳо дар доираи кӯмаки техникӣ инчунин масъалаҳои бознигарии заминаи меъёрию ҳуқуқии ҷорӣ оид ба танзим ва назорати бахши бонкӣ, таҳия ва дар амал татбиқ намудани дастурамалҳои нав, гузаронидани тренингҳо ва семинарҳо оид ба зиёд кардани зарфияти кормандон, бахусус дар самти бонкдории исломӣ, тақвият бахшидани низоми суғурта, таҳияи шаклҳои нави ҳисоботи молиявӣ тибқи меъёрҳои байналмилалӣ ва рақамикунонии онҳо, таҳияи санадҳои меъёрӣ оид ба ҳисоббаробарориҳои актуарӣ, раванди истифодаи индикаторҳои муайянкунии устувории молиявии бозори суғурта, гузаронидани машваратҳо барои ташкилотҳои суғуртавӣ дар самти ҳимояи ҳуқуқи истеъмолкунандагон, ташкили институти Омбудсмени молиявӣ дар Тоҷикистон ва таҳияи санади стратегиро мавриди баррасӣ қарор доданд.

Дар фароварди мулоқот муовини раиси Бонки миллии Тоҷикистон Фирдавс Толибзода ба ҳайати намояндагии БОР барои ҳамкории доимӣ бо Бонки миллии Тоҷикистон изҳори сипос намуда, зимнан изҳори боварӣ намуд, ки густариши минбаъдаи ҳамкориҳо дар самтҳои гуногуни иқтисод, аз ҷумла низоми бонкӣ самарабахш хоҳад буд.

Маврид ба зикр аст, ки дар мулоқоти фосилавии мазкур иқтисодичии намояндагии доимии БОР дар Тоҷикистон Муҳаммадӣ Бобоев ва роҳбарони сохторҳои дахлдори БМТ ширкат варзиданд.

Шуъбаи матбуот