Тоҷикистон - кишвари дарёҳои тиллоӣ

16 марти соли 2022 ҳайати кормандони дастгоҳи марказии Бонки миллии Тоҷикистон дар арафаи таҷлили Наврӯзи байналмилалӣ аз намоиши “Тоҷикистон - кишвари дарёҳои тиллоӣ” баҳравар шуданд.

Дар даврони соҳибистиқлолӣ намоиши “Тоҷикистон - кишвари дарёҳои тиллоӣ” бузургтарин намоиш буда, аз нигораҳои таърихии Муассисаи давлатии “Осорхонаи миллӣ”-и назди Президенти Ҷумҳурии Тоҷикистон ва Осорхонаи миллии бостоншиносии Академияи миллии илмҳои Тоҷикистон иборат мебошад, ки тули се моҳ дар Осорхонаи ҳунарҳои миллии Осиё “Гиме”-и Франсия муаррифӣ шудааст.

Дар намоиши “Тоҷикистон - кишвари дарёҳои тиллоӣ” беҳтарин шоҳкориҳои ниёгон, ки инъикосгари таъриху тамаддуни халқи тоҷик мебошанд, ба маърази тамошо гузошта шудаанд. Ҳангоми боздид аз намоиши мазкур, ки дар Осорхонаи миллӣ қарор дорад, мутахассиси масъули ин даргоҳ ба кормандон доир ба нигораҳои таърихӣ макону замони бозёфт шудани онҳо маълумоти муфассал манзур намуд.

Дар доираи ин намоиш кормандони Бонки миллии Тоҷикистон оид ба мероси таърихию фарҳангӣ, аз ҷумла табиат, таърихи бостон ва асрҳои миёна, таърихи нав ва навтарин, санъати тасвирӣ-амалӣ дидан карда, бо таърихи беш аз шашҳазорсолаи миллати тоҷик, ашёи таърихӣ аз ёдгориҳои ҳудуди имрӯзаи Тоҷикистон, тамаддуну фарҳанги қадимии мардуми тоҷик, дар мисоли Саразми бостонӣ, Тахти Сангин, Панҷакенти қадимӣ ва дастовардҳои замони истиқлол, ки ба намоиш гузошта шудаанд, дидан карданд.

Бо мақсади огоҳӣ доштан аз таъриху тамаддуни худ ва бою ғанӣ гардонидани тасаввуроти фарҳангию таърихӣ, кормандони Бонки миллии Тоҷикистон тасмим доранд, ки то охири моҳи март бо аҳли оила ва фарзандони хеш аз ин намоиши бузурги “Тоҷикистон - кишвари дарёҳои тиллоӣ” баҳравар гарданд.

Хотиррасон бояд кард, ки намоиши “Тоҷикистон - кишвари дарёҳои тиллоӣ” иборат аз 300 ёдгораҳои таърихии Осорхонаи миллии Тоҷикистон ва Осорхонаи миллии бостоншиносии Тоҷикистон, ки қисми зиёди онҳо боре ҳам ҳудуди Тоҷикистонро тарк накардаанд, тӯли 3 моҳ (13.10.2021-10.01.2022) дар толорҳои Осорхонаи машҳури Париж “Гиме” қарор доштанд.

Руйхати нигораҳо аз ҷониби мутахассисони ҳарду кишвар таҳия гардидаанд. Осорхонаи "Гиме" имрӯз яке аз бузургтарин осорхонаҳои осиёии бадеӣ ва берун аз ҳудуди Осиё қарордошта мебошад.

Шуъбаи матбуот