16.02.2007

Машварат дар БМТ

15 феврали соли 2006 дар Бонки миллии Тоҷикистон бо иштироки роҳбарият, сардорони мудирияту идораҳои Бонки миллии Тоҷикистон, роҳбарони бонкҳои тиҷоратӣ, ташкилотҳои молиявии ғайрибонкӣ ва мутахассисони соҳа маҷлиси машваратии корӣ баргузор гардид.  Дар он вазъи бозори асъор, фаъолияти бонкҳою ташкилотҳои молиявии ғайрибонкӣ ва нуқтаҳои мубодилаи асъор дар ин бозор мавриди баррасӣ қарор гирифт.  Раиси Бонки миллии Тоҷикистон оиди ин масъала суханронӣ намуда, тазаккур дод, ки ҳоло дар ҷумҳурӣ 953 нуқтаи мубодилаи асъор фаъолият доранд. Аз ин миқдор 132 тои он ба шахсони воқеӣ ва боқимондаашон ба бонкҳои тиҷоратӣ ва ташкилотҳои ғайрибонкии молиявӣ тааллуқ доранд.  М. Алимардонов зимни суханронии хеш дар баробари муваффақиятҳо камбудиҳои ҷиддии дар кори нуқтаҳои табодули асъор ҷойдоштаро махсусан қайд намуд.  Изҳор гардид, ки аксарияти ин нуқтаҳо дар пойтахти мамлакат ва шаҳрҳои калон ҷойгир шудаанд. Дар ноҳияҳои дурдасти ҷумҳурӣ бошад, шумораи онҳо хеле кам аст. Илова бар ин, бонкҳои тиҷоратӣ ва ташкилотҳои молиявии ғайрибонкӣ фаъолияти нуқтаҳои мубодилаи асъори ба онҳо таллуқ доштаро ба таври зарурӣ назорат намекунанд.  Раиси БМТ дар назди роҳбарони бонкҳои тиҷоратӣ ва ташкилотҳои молиявии ғайрибонкӣ вазифа гузошт, ки камбудиҳои дар фаъолияти нуқтаҳои мубодилаи асъор ҷойдоштаро ҳарчӣ зудтар бартараф созанд ва барои дар ноҳияҳои дурдасти ҷумҳурӣ кушодани чунин нуқтаҳо кӯшиш ба харч диҳанд. Зеро, таъкид кард мавсуф, муътадилии бозори дохилии асъор дар ҷумҳурӣ аз бисёр ҷиҳат аз фаъолияти хуби ин нуқтаҳо вобаста мебошад.  Дар маҷлиси машваратӣ роҳбарони як қатор бонкҳои тиҷоратӣ ва ташкилотҳои молиявии ғайрибонкӣ суханронӣ намуда, оиди масъалаҳои муҳокимашуда андешаҳои худро иброз доштанд.