26.01.2007

Мизи мудаввар дар Бонки миллии Тоҷикистон

“Оид ба ҳисоботи низоми бонкӣ дар соли 2006 ва дурнамои он барои соли 2007, мушкилоти дар низоми маблағгузории хурд ва соҳаи кишоварзӣ, бахусус дар ноҳияҳои кӯҳистон ҷойдошта”, - чунин ном дошт ҷаласаи мизи мудавваре, ки 26 январи соли 2007 дар Бонки миллии Тоҷикистон баргузор гардид. Дар кори он роҳбарияти БМТ, сардорони тамоми бонкҳои мустақил, аз ҷумла 1 бонк бо сармояи пурраи хориҷӣ (ҶСП “Аввалин бонки молиявии хурд”), ҷамъиятҳои қарздиҳӣ, ташкилотҳои молиявии ғайрибонкӣ, ташкилотҳои амонатии кредитии хурд, ташкилотҳои қарзии хурд ва фондҳои қарздиҳии хурд ширкат варзиданд.  Дар бораи нишондиҳандаҳои низоми бонкӣ дар соли 2006 ва дурнамои он барои соли 2007 бо маърӯзаи муфассал дар назди ҳозирин Раиси Бонки миллии Тоҷикистон М. Алимардонов баромад намуд. Баъди таҳлили ҳаматарафаи фаъолияти низоми бонкӣ дар соли гузашта ва нишон додани комёбию норасогиҳои мавҷуда М. Алимардонов тамоми роҳбарони бонкҳо ва ташкилотҳои ғайрибонкии молиявии ҷумҳуриро ба ҷалби ҳарчи бештари амонатҳои шахсони воқей ва боз ҳам беҳтар намудани хизматрасониҳои бонкӣ, аз ҷумла зиёд кардани шумораи пешниҳоди қарзҳои хурд ба мардум ба хотири баланд бардоштани сатҳи зиндагии аҳолӣ даъват намуд.  Дар рафти ҷаласаи мизи мудаввар роҳбарони бонкҳо, Ассотсиатсияи ташкилотҳои маблағгузории хурд, ташкилоту фондҳои қарзии хурд дар мавриди мушкилотҳои дар фаъолияти ташкилотҳои маблағгузории хурд ва соҳаи кишоварзӣ ҷойдошта ибрози назар намуда, барои рушди маблағгузории хурд дар ояндаи наздик, роҳу воситаҳои беҳтар кардани он пешниҳодҳои ҷолиб пешкаш карданд.