07.09.2006

Маҷлиси тантанавӣ дар Бонки миллии Тоҷикистон

Дар Бонки миллии Тоҷикистон бахшида ба фарорасии 15-умин солгарди Истиқлолияти давлатии Ҷумҳурии Тоҷикистон маҷлиси тантанавӣ баргузор гардид. Дар назди кормандони бонк Раиси Бонки миллии Тоҷикистон М. Алимардонов бо паёми табрикӣ суханронӣ намуд. Ӯ аҳли нишастро бо ҷашни умумихалқӣ табрик намуда, иброз дошт, ки ин ҷашн ба соле рост омадааст, ки тамоми мардуми кишвари азизамон 2700-солагии шаҳри бостонии Кӯлоб, бузургдошти Тамаддуни Ориёиро истиқбол мегиранд ва ба гузаронидани Анҷумани тоҷикони ҷаҳон тайёрӣ мебинанд.  Истиқлолият дастоварди муҳимтарину бузург, неъмати бебаҳои ҳама гуна халқу миллат ба шумор меравад. Шарофати ҳамин истиқлолият аст, ки мо соҳиби Парчам, Нишони давлатӣ, Суруди миллӣ, Артиши миллӣ, Қувваҳои сарҳадӣ, пули миллӣ ва узви комилҳуқуқи Созмони Милали Муттаҳид ва аъзои чандин созмонҳои бонуфузи байналмилалӣ шавем.  Имрӯз, мо бо қаноатмандӣ гуфта метавонем, ки дар солҳои истиқлолият ташаккули муносибатҳои нави иқтисодӣ ва татбиқи ислоҳоти бунёдӣ дар соҳаи иқтисодиёт ба рушди ҳама соҳаҳои хоҷагии халқи кишварамон мусоидат намуданд. Сохтмони роҳи оҳани Ќӯрғонтеппа-Кӯлоб, шоҳроҳи автомобилгарди Кӯлоб-Қалъаи Хум-Қулма, анҷоми сохтмони нақби мошингарди Анзоб, оғози сохтмони нақби Шаҳристон, оғози бунёди нерӯгоҳҳои барқии Сангтӯда-1, Сангтўда-2, ГЭС-и Роғун ва чандин корхонаҳои саноативу муассисаҳои маданӣ-маишӣ, аз ҷумлаи дастовардҳои даврони истиқлолият ба шумор мераванд.  Бояд гуфт, ки дар ин муваффақиятҳо дар қатори дигар системаҳои пешбарандаи ҷамъиятӣ нақши низоми бонкӣ низ хеле калон аст. Низоми бонкии Ҷумҳурии Тоҷикистон айни замон 8 бонки мустақил, як филиали бонки хориҷӣ, 8 ҷамъияти қарздиҳӣ ва 44 ташкилоти молиявии ғайрибонкиро дар бар мегирад.  Бонки миллии Тоҷикистон ба ифтихори 15-умин солгарди истиқлолияти Тоҷикистон, ҷашни 2700-солагии шаҳри Кӯлоб ва бузургдошти Соли тамаддуни ориёӣ тангаҳои хотиравиро ба муомилот баровард, - иброз дошт сарвари БМТ М. Алимардонов.  Кормандони Бонки миллии Тоҷикистон Раиси БМТ М. Алимардоновро ба муносибати дар арафаи ҷашни Истиқлол бо Ордени “Исмоили Сомонӣ” дараҷаи II сарфароз шуданаш табрику муборакбод гуфтанд.  Раиси БМТ ба як қатор роҳбарон ва мутахассисони бонк барои меҳнати шоёнашон нишони сарисинагии “Аълочии Бонкии миллии Тоҷикистон”-ро супорида, ба онҳо дар фаъолияти касбиашон комёбиҳо орзу намуд.