25.08.2006
Ҳайати ХБА кори худро оғоз намуд
25 августи соли 2006 ҳайати навбатии Хазинаи байналхалқии асъор (ХБА) таҳти сарварии ҷаноби Карлос Пинеруа, ки ба ҷумҳурии мо ташриф овард, кори худро оғоз намуд. Худи ҳамон рӯз вохӯрӣ ва мулоқоти аъзои ҳайати ХБА бо гурӯҳи иқтисодии Ҳукумати Ҷумҳурии Тоҷикистон дар ҳайати Мушовири давлатии Президенти мамлакат оид ба масъалаҳои иқтисодӣ М. Давлатов, вазири молия С. Наҷмиддинов Раиси Бонки миллии Тоҷикистон М.Алимардонов, намояндагони вазорати иқтисод ва савдо ва вазорати даромадҳо ва пардохтҳои давлатӣ баргузор гардид. Мушовири давлатӣ оид ба масъалаҳои иқтисодӣ ба масъалаи нишондиҳандаҳои иқтисодӣ дахл намуда, изҳор дошт, ки дар давраи аз январ то июл рушди мӯътадили истеҳсолоти ватанӣ нигоҳ дошта шуд, сатҳи истеҳсолоти ММД дар январ - июл мутаносибан баланд буд ва 7,2% ташкил намуд. Дар ин давра ҷараёни баробаршавии нархҳои дохилӣ ва таваррум, ки сатҳи он дар давраи гузашта 7,5 % -ро ташкил намуда буд, идома ёфт, музди маош дар Ҷумҳурии Тоҷикистон дар шаш моҳи аввали соли 2006 назар ба ҳамин давраи соли гузашта ба андозаи 24,2 фоиз баланд шуд. Бахши сохтмон ва манзил бо суръат инкишоф меёбад, вале дар бозори истеъмолӣ қисми зиёди молу маҳсулот ба ҷумҳурӣ ворид карда мешаванд, ки ин дар моҳҳои январ-июл ба тавозуни савдои манфӣ оварда расонид. Ин каср яке тамоюлҳои асосии фишор ба паст шудани қурби асъори миллӣ, ки аз оғози сол нисбат ба доллари ИМА 4,8%-ро ташкил дод, мебошад. Рушди бахши молиявию бонкӣ идома дорад. Дороиҳои умумии бонкҳо, ҷамъиятҳои қарзӣ ва дигар ташкилотҳои ғайрибонкии молиявӣ нисбат ба ММД дар моҳҳои январ – июн аз 22,2% то 26,4% зиёд шудан, ки ин аз баланд шудани саҳми ин низом дар иқтисодиёт шаҳодат медиҳад. Амонатҳо, ки сарчашмаи муҳими сармоягузории дохилӣ ба шумор мераванд, дар ин давра 28,8% зиёд шуданд. Дар ҷараёни вохӯрӣ қайд гардид, ки нобаробарии инкишофи истеҳсолот ва талаботи дохилӣ, болоравии хароҷоти мавсимии давлатӣ ва ноустувории нархҳо дар бозорҳои ҷаҳонӣ ба сатҳи таваррум таъсир хоҳанд расонд. Вобаста ба ин, Бонки миллии Тоҷикистон як андоза сиёсати монетариро мустаҳкам ва меъёри бозтамвилро аз 8,5 % то 9,0% зиёд менамояд. Сардори ҳайати МВФ ҷаноби Пенеруа иттилоъ дод, ки мақсади асосии ҳайат ин кӯмак ба Вазорати молияи Ҷумҳурии Тоҷикистон дар бахши омода намудани буҷети давлатӣ барои соли 2007 бо назардошти ба заминаи буҷети миёнамӯҳлат дохил кардани қарзҳои хориҷӣ мебошад. Номбурда иброз дошт, ки масъалаҳои марбут ба нақшаи истифодаи маблағҳои дар натиҷаи аз тарафи ХБА бахшида шудани қарзҳо ба миёномада дар чаҳорӯбаи ташаббуси паст кардани бори қарздории бисёрҷанба баррасӣ хоҳанд шуд. Дар ҷараёни ташрифи ҳайат, як қатор вохӯриҳои аъзои он бо роҳбарон ва мутахассисони вазорату идораҳои иқтисодии мамлакат, бонкҳои тиҷоратӣ ба нақша гирифта шудаанд. Ҳайати ХБА 1 сентябри соли равон кори худро анҷом медиҳад.
