Ҷаласаи нахустини Гурӯҳи корӣ оид ба масъалаҳои рушди низоми пардохт

Вусъат бахшидани ҳиссаи ҳисобаробаркуниҳои ғайринақдӣ ҳамчун омили таъмини шаффофияти молиявӣ ва коҳиш додани ҳиссаи амалиётҳои иқтисодии пасипардагӣ аз вазифаҳои афзалиятноки ҳукумати кишвар маҳсуб меёбад. Дар шароити имрӯзаи рушди низоми пардохти миллӣ зиёд намудани дастрасӣ ба намудҳои гуногуни пардохт бо истифодаи кортҳои пардохтӣ вазифаҳои аввалиндараҷа баён мешавад.

Дар робита ба ин, бо супориши муовини аввали Сарвазири кишвар Давлаталӣ Саид дар назди Бонки миллии Тоҷикистон аз ҳисоби мутахассисони вазорату идораҳо Гурӯҳи кории байниидоравӣ оид ба баррасии масъалаҳои рушди низоми пардохт ва афзудани ҳиссаи ҳисобаробаркуниҳои ғайринақдӣ дар муомилот таъсис дода шуд.

Санаи 16 феврали соли 2018 ҷаласаи нахустини Гурӯҳи кории мазкур таҳти роҳбарии муовини Раиси Бонки миллии Тоҷикистон Салимова Л. Ҷ. доир гардид. Дар ҷаласаи мазкур масъалаҳои вобаста ба ҷорӣ намудани истифодаи таҷҳизоти муосири ҳисобарбаробаркунии ғайринақдӣ ҳангоми пардохтҳои алоҳида, аз ҷумла, пардохти андоз, хизматрасониҳои давлатӣ, коммуналӣ ва дигар намудҳои пардохт муҳокима гардиданд.

Зимни ҷаласаи Гурӯҳи корӣ аз ҷониби Бонки миллии Тоҷикистон вобаста ба зиёд намудани саҳми ҳисобаробаркуниҳои ғайринақдӣ чораву тадбирҳои мушаххас баён гардида, ҳамзамон лоиҳаи тағйиру иловаҳо ба як қатор қонунҳои амалкунанда оид ба ҳавасмандсозии субъектҳои хоҷагидор барои гузариш ба ҳисобаробаркунии ғайринақдӣ пешниҳод карда шуд.

Шуъбаи матбуоти БМТ