14.09.2007

Дар Бонки миллии Тоҷикистон форуми Тоҷикистону Қазоқистон “Дурнамои ҳамкориҳои инвеститсионӣ” баргузор гардид

13 сентябри соли 2007 дар чаҳорчӯбаи ташрифи расмии Президенти Ҷумҳурии Қазоқистон Н. Назарбоев ба Ҷумҳурии Тоҷикистон, дар Бонки миллии Тоҷикистон форуми Тоҷикистону Қазоқистон “Дурнамои ҳамкориҳои инвеститсионӣ” баргузор гардид, ки дар кори он Президенти Ҷумҳурии Тоҷикистон Э. Раҳмон ва Президенти Ҷумҳурии Қазоқистон Н. Назарбоев ширкат варзиданд.  Президенти Ҷумҳурии Тоҷикистон бо сухани шодбошӣ ба иштирокдорони форум муроҷиат намуд. Ӯ, аз он ҷумла, қайд намуд, ки Тоҷикистону Қазоқистонро муносибати дӯстона ва ҳамкориҳо ба ҳам мепайвандад, форуми мазкур бояд макони барқарор гаштани муносибатҳои корӣ гардад. Фазои ҷамъиятию сиёсие, ки дар Тоҷикистон ташаккул ёфтааст, ба беҳтар гаштани муҳити инвеститсионӣ мусоидат менамояд, - таъкид намуд Сардори давлат. Доду гирифт байни давлатҳои мо тайи солҳои охир хеле зиёд шуд. Президенти ҶТ чунин соҳаҳоро, аз қабили гидроэнергетика, саноати кӯҳӣ, пахта, сайёҳӣ ҳамчун соҳаҳои афзалиятнок барои ҳамкорӣ номид. Тоҷикистон ҳамоно ҳамчун дорандаи захираҳои бузурги гирдоэнергетикӣ боқӣ мемонад ва то имрӯз ҳамагӣ 6 фоизӣ имкониятҳои худро истифода мебарад. Дар назар аст, ки то соли 2025 тавлиди барқ то 80 млрд. кв/с. расонида мешавад. Амалӣ намудани лоиҳаҳои сохтмони НОБ, хати интиқоли барқ ва ғайра хусусияти минтақавӣ дошта, барои тамоми мамлакатҳои минтақа аз ҷиҳати иқтисодӣ фоидаовар мебошад, - иброз дошт Э. Раҳмон.  Президенти Ҷумҳурии Қазоқистон Н. Назарбоев зимни суханронии хеш дар назди иштирокдорони форум қайд намуд, ки дар ҷарайни мулоқоти худ бо роҳбарияти Тоҷикистон масъалаҳое мавриди баррасӣ қарор гирифтанд, ки аҳамияти стратегӣ доранд. Н. Назарбаев оиди муҳити инвеститсионии Қазоқистон сухан ронда, изҳор кард, ки ба мамлакаташ 70 млрд.доллари ИМА сармояи хориҷӣ ворид шуд, ки ин 80 фоизи маблағгузориҳоро ба минтақаи Осиёи марказӣ ташкил медиҳад. Илова бар ин, маблағгузориҳои дохилӣ имрӯз 80 млрд. доллари ИМА-ро ташкил медиҳанд. Дар ҳоли ҳозир 60 давлати дунё сармояи худро ба иқтисодиёти Қазоқистон ворид кардааст. Сарвари Қазоқистон изҳор намуд, ки мамлакаташ ният дорад дар баробари дар дигар давлатҳо ( дар вақтҳои охир ҳаҷми инвеститсияи Қазоқистон дар хориҷа 26 млрд. доллари ИМА-ро ташкил дод) маблағгузориро дар Тоҷикистон идома бидиҳад. Ӯ қайд кард, ки дар айни замон 74 корхонаҳои гуногунҳаҷми Тоҷикистон дар Қазоқистон фаъолият мекунанд. Дар назар аст, ки шумораи корхонаҳои Қазоқистон дар Тоҷикистон зиёд карда мешаванд ва барои ин шароити дилхоҳи иқтисодӣ ва заминаи зарурии ҳуқуқии дар Тоҷикиситон омодашуда мусоидат менамоянд.  Н. Назарбоев ҳавасмандии Қазоқистонро нисбати инкишофи мамолики минтақа, бахусус Тоҷикистон қайд намуд.  Баъди анҷоми суханрониҳои Президентҳои Тоҷикистону Қазоқистон форуми якрӯза бо иштироки роҳбарони як қатор вазорату идораҳо, корхонаҳои бузург, бонкҳо ва ширкатҳои инвеститсионӣ баргузор гардид.